Aniceto-Olinda la simu iha familia hakarak peñor oan selu kost

Deputada bankada KHUNTO, Olinda Guterres, konsidera, kazál ida ne’ebé tenta atu peñor nia oan hodi selu kost, hanesan tentativa atu hamoe no hamonu Governu, no Prezidente Parlamentu Nasionál, Aniceto Guterres, konsidera aktu peñor ne’e krime.

Deputada Olinda kestiona katak, publikasaun hosi media balun relasiona ho família vulnerável ne’ebé tenta atu peñor nia oan rasik, tanba de’it na’in ba uma ne’ebé fó aluga ba ezije osan atu selu hela fatin refere, enkuantu Governu rasik hasai desizaun hodi implementa serka sanitária no konfinamentu obrigatóriu ne’ebé iha limitasaun barak ba populasaun,  kuaze fulan tolu ona.

“Kona-bá mana ida peñor nia oan, ha’u so hateten de’it hanesan ne’e, husu ba Governu, sira ne’ebé hala’o ba área ida ne’e, liu-liu ba maluk sira ne’ebé hala’o sesta bázika ne’e, halo favór ida bele hakat to’o iha fatin. Ida ne’e so de’it hahán laiha, gadai (peñor) nia oan ba osan, ne’e polítika, ne’e polítika atu halo monu governu. Ha’u la fi’ar ema ida lori nia oan atu peñor, gadai fali ba ema nia uma kuartu ne’ebé fulan ida USD 35? Lójika ne’e iha ne’ebé? Ema ne’ebé la iha oan ne’e buka oan, agora ita iha oan hakarak atu ba peñor fali ita-nia oan, ne’e laiha lójika,  ne’e polítika, ne’e atu hamoe Governu, atu hamonu Governu, maibe Governu ida ne’e la nakdoko. Maluk media sira, ha’u hateten ba ita bo’ot sira, ha’u lakohi hirus ita bo’ot sira, maibe ita bo’ot sira nia ko’alia no hahalok, fó sai iha media sira hotu-hotu, ne’e ha’u ladun gosta, ema ida gadai nia oan ba osan ne’e, hodi aluga fatin ne’e, ha’u la fiar ida”,tenik deputada Olinda, iha nia intervensaun, liuhosi plenária, Segunda (17/05/2021).

Nune’e Prezidente Parlamentu Nasionál, Aniceto Guterres mós konsidera, inan aman ne’ebé peñor nia oan, hanesan krime ne’ebé sériu, tanba ne’e husu parte kompetente atu investiga hodi prosesa.

“Informasaun ida kona-bá inan peñor nia oan atu hetan buat ruma ka atu hetan hahán ba moris, ne’e krime sériu. Ema ne’ebé inan ka aman ne’ebé peñor nia oan, nia mós komete krime, ida ne’ebé simu peñor mós krime hotu. Tanba ne’e, ha’u sei husu ba Governu, ba PNTL atu investiga, loos kala’e? Se loos, tenke prosesa, se la loos mós tenke deklara, ne’e krime”,deklara PPN Aniceto.

Alénde ne’e, deputada bankada CNRT, Fernanda Lay, lamenta, Orsamentu Jerál Estadu (OJE), aprovadu no promulgadu, maibe povu kontinua halerik iha fatin-fatin, tanba implementa konfinamentu obrigatóriu, maibe Governu la prepara kondisaun.

“OJE ho Orsamentu Retifikativu aprovadu no promulgadu, mas ita iha problema lubuk ida ne’ebé presiza iha solusaun, ate agora laiha solusaun, ida kona-bá sesta bázika, loos, tanba sa mak hakna’ok, orsamentu aprovadu, qual é problema? ai-han autoriza ona atu foti ai-han importadu, tanba ministru la mai iha ne’e atu hateten stock hira? ita presiza hatene stock! maibe MAP rasik dehan primeira époka ita sei kolleta maka’as, maibe agora foos rai de’it mós iha loja laiha, ida ne’e komplikadu. Apoiu sosial iha Díli de’it, família ida horkalan iha Televizaun halo ita-nia laran taridu, nia ba gadai nia oan para hodi bele selu kost, MSS iha ne’ebé? Sekretáriu Estadu ba fó ajudu dezastre naturais, nia hala’o nia papel, maibe agora papel MSSI nian. Ministra ho Vise Ministra feto, maibe kasian feto ida ba gadai nia oan para hodi bele han, ha’u la kompriende, dadus mak laiha ka osan mak laiha ka oinsa”,kestiona deputada opozisaun ne’e.

Antes ne’e sidadaun Rosalito de Jesus, ne’ebé laiha kbiit atu selu kost, hatete, kost na’in mai sisi sira atu selu ona osan fulan, maibe sira araska tebes no laiha osan atu selu kost tanba serka sanitária no konfinamentu obrigatóriu ne’ebé Governu aplika impede atividade ekonómiku la’o la di’ak, no sira atu ba sira-nia munisípiu, fatin orijin ne’ebé sira moris ba atu ba foti hahán no husu ajuda ba família sira fó netik osan mos labele la’o, tanba transporte públiku paradu totál. Tanba ne’e, afeta tebes ba sira nia família iha momentu ida ne’e.

“Ha’u kbiit la to’o atu selu kost. Ha’u nia oan mak ne’e, foti ba hela ho ita bo’ot, pois nia aman servisu iha osan ba mak ha’u ba hasai fali ha’u-nia oan”,dehan Celia Maculada Pinto espoza husi Rosalito de Jesus ne’ebé iha oan na’in rua (João no Elizabeth), ho matan-been bainhira dada-lia ho GMN iha sira-nia horik fatin kost.

Antes ne’e mos akontese ona, sidadaun feto ida ne’ebé tara-an iha parte Comoro, tanba de’it laiha hahán no moe atu husu ba ema seluk.

Antes ne’e mos, Xefe Estadu Maior Jeneral, Falintil-FDTL, Tenente Jeneral Lere Anan Timur, hatete, ba problema sosiuekonómiku ne’ebé halo provu sai sofre iha nia rai rasik, Governu tenke rezolve didiak hodi ultrapasa, se lae mak povu sei hakilar hasoru ukun-nain sira.

Enkuantu kada tinan Governu hato’o proposta orsamentu ne’ebé bo’ot ba Parlamentu Nasionál, hodi diskute no aprova, nune’e mos ba tinan 2021, Parlamentu Nasionál aprova Orsamentu Jerál Estadu ho montante billaun 1.895, inklui orsamentu retifikativu ne’ebé ho montante tokon USD 633 resin, atu responde ba kalamidade ne’ebé Timor-Leste hasoru, inklui atu responde ba situasaun Covid-19 iha Timor-Leste.Say

Leave a Reply

Your email address will not be published. Required fields are marked *