PNTL detein grupu organizadu na’ok motorizada iha Díli

Polísia Nasionál Timor-Leste (PNTL) Díli detein suspeitu na’in tolu ne’ebé deskonfia husi grupu organizadu na’ok motorizada iha kapitál Díli.

Suspeitu na’in tolu ne’e kaptura husi servisu PNTL, liu husi servisu investigasaun munisípiu Díli ho servisu intelijénsia iha área Casnafar, postu administrativu Dom Aleixo, munisípiu Díli, Kinta (10/12/2020), mais ou menus tuku 05:00 madrugada oras Timor-Leste.

Suspeitu sira ne’ebé polísia kaptura ho evidénsia motorizada haat, ne’ebé deskonfia mane na’in haat ne’e na’ok husi komunidade.

Motorizada sira ne’e ho marka Honda Beat. Alende ne’e polísia rekolla mós xave motorizada ne’ebé sira utiliza hodi na’ok ema nia motorizada.

Hafoin kaptura suspeitu sira ne’e, polísia transporta suspeitu sira ho evidénsia husi área Casnafar mai iha Kuartel PNTL Caicoli-Díli no detein sira iha sela polísia.

Segundu Komandante PNTL munisípiu Díli, Superintendente Euclides Belo, hateten, suspeitu na’in tolu ne’e sei submete ba prosesu investigasaun, tanba konsidera sira na’in tolu envolve iha kazu furtu ou na’ok.

“Portantu operasaun ne’e operasaun normál komando PNTL munisípiu Díli hala’o ba objetu motorizada komunidade nian ne’ebé lakon ita buka seidauk hetan, maibé ho planu  operasaun ne’ebé ami trasa planu. Ne’e mak ohin operasaun ne’e mak ami halo mais detallu ami hala’o iha área Dom Aleixo ninian, ami konsege hetan motorizada haat, inklui  mós suspeitu ne’ebé utiliza motorizada ne’e. Agora dau-dauk submete ona ba prosesu investigasaun identifikasaun ba, ita suspeita sira ba kazu na’ok ka furtu, dau-dauk ne’e prosesu la’o hela”, Segundu Komandante PNTL munisípiu Díli ne’e ba GMN iha Kuartel Polísia Caicoli-Díli.

Ho nune’e, Euclides Belo apela ba komunidade hirak ne’ebé sente motorizada lakon bele lori dokumentu mai haree sira ninia motorizada.

Suspeitu na’in tolu ne’e ho inisiál JDX, JDCP no GDA no polísia konsidera mós hanesan autór prinsipál na’ok ten ne’ebé hanaran sira-nia grupu Na’ok Ten Rona Malu (NAKROMA). avi