Tránzitu prende Taxi 15 no motorizada 9

Autoridade  Tránzitu  Munisípiu Díli prende  kareta  Taxi 15 tanba kondutor  komete  infrasaun hanesan la uza farda kompletu no la  monta lampu taxi.  Nune’e mos prende motorizada  9 ne’ebé la uza espellu no la monta sapa matríkula.

“Polísia  prende ami nia kareta tanba ami la uza farda kompletu,  depois ami la monta lampu taxi iha kareta.  Maibe  ami prontu kolobora ho autoridade tránzitu, wainhira sira fó billete infrasaun ami  simu ba selu  iha Banco Nacional Ultramarino (BNU), atu nun’e ami bele foti fali ami nia kareta.  No ba oin ami sei kumpri regras  Tránzitu hodi labele komete tan infrasaun”,esplika kondutor Arnaldo Sarmento, ba GMN Segunda (28/01/19) iha Mandarin Díli.

Alende ne’e iha pasa revista ne’e,  kondutor taxista ida halai subar a’an husi Polísia hodi husik hela nia kareta iha estrada ninin iha Mandarin. Tanba ne’e Polísia lori kadeadu blokeadu hodi savi tiha kareta nia roda.

Entretantu pesoal Polísia ida  haktuir,  motorista tantu kareta no motor sei ba selu tiha multa iha banku hafoin sira foti  hikas sira ninia transporte iha Kuartel PNTL  Munisípiu  Díli.

Alende ne’e tuir tabele infrasaun bazeia ba diploma Ministérial  númeru 2 no númeru 3/2003,  la uza   lampu  Taxi  no hakerek liafuan Taxi  tuir artigu  numeru 3 a,b  sei selu multa husi $ 10 to’o 30.

Kondutor  Taxi la uza farda  tuir artigu  6 númeru 3 sei selu multa $  40, no  kondutor Taxi la uza  farda la kompletu tuir artigu 7 númeru 3 sei selu multa $ 15.

Enkuantu motorizadas la monta sapa matrikula  tuir artigu 112  númeru  8  sei selu multa  $ 9 to’o  60.avi