JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

La hetan direitu USD 200, reklamante Comoro protesta Governu

La hetan direitu USD 200, reklamante Comoro protesta Governu

Reklamante suku Comoro protesta ho servisu Governu, tanba la hetan USD 200 ne’ebé Ministériu Solidariedade Sosiál no Inkluzaun (MSSI) distribui ona ba reklamante sira.

Juleriana Hornai, nu’udár reklamante suku Comoro la konkorda ho servisu Governu, liu-liu Ministériu Administrasaun Estatal (MAE) no MSSI kona-bá subsídiu USD 200 ne’ebé realiza ona ba lista reklamante sira, maibé sira nafatin la hetan direitu ba subsídiu famíliar ne’e.

Tuir benefisiáriu durante ne’e sira trata hotu dokumentu no submete ona ba Xefe aldeia no Xefe suku sira, maibé ikus mai naran la sai iha lista hodi hetan USD 200.

“Ami mai check mós naran laiha, ami mai to’o iha Xefe aldeia, Xefe suku dehan naran iha sosiál, ami to’o iha sosiál, sosiál dehan naran iha estatal mak la fó ami, entaun ami ba fali iha estatal ne’ebá, estatal dehan naran ne’e hatama tiha ona, halo ami dolar tun dolar sa’e mai naran laiha nafatin, naran sira ne’e ba iha ne’ebé, ita tur ba hanoin triste fali ita ema sidadaun Timor-Leste ka la’ós, sé ita dehan la’ós sidadaun Timor-Leste loos duni, ita servisu ba ida ne’e loos ka la’e dehan laiha, entaun ko’alia loloos de’it labele ami povu ne’e hanesan lixu sama ba rai ne’e laloos”, Benefisiáriu suku Comoro ne’e ba GMN ho lian maka’as iha sede suku Comoro, Sesta (15/01/2021).

Benefisiáriu (reklamante), Tito Livio husi aldeia Baya Leste, hateten, maske antes ne’e submete ona naran ba Xefe aldeia no suku, maibé realidade naran la sai nafatin iha lista hodi hetan diretu ne’ebé MSSI hala’o iha Díli durante loron neen.

“Ami mai ko’alia ami nia direitu, tanba ami hetan reklamante, maibé ami nia naran la sai, ami la simu ne’e ami hakarak mai husu ami nia direitu”, hateten Tito Livio.

Xefe Suku Comoro, Eurico da Costa, hatutan, ba benefisiáriu sira ne’ebé ladauk hetan direitu, autoridade lokál sei prosesu naran hirak ne’e hafoin termina pagamentu ba lista reklamasaun.

“Pagamentu remata tiha ami sei rekore fila-fali prosesu reklamante sira ne’ebé la hetan osan, ami halo fali surat aldeia ida-idak hamutuk halo rejunsaun dokumentu haruka fila-fali MAE” dehan Xefe suku Comoro ne’e.

Hatán ba preokupasaun ne’e, Diretór Jerál Dezentralizasaun Administrativu MAE, Belarmino Filomeno Neves, hateten, lista ne’ebé MAE simu bazeia ba dadus ne’ebé mai husi Xefe suku no Xefe aldeia sira.

Belarmino esplika antes ne’e, sira simu lista reklamasaun liu rihun 15, maibé reduz ba rihun 12 hafoin halo análiza ba númeru reklamante, tanba durante análiza hatudu maioria naran dobru no balun simu ona USD 200.

“Ami simu husi suku saída mak sira halo ida ne’e mak ami hatutan ba MSSI atu klarifika sé dehan katak la kompletu ami simu mai husi ne’ebá ida ne’e mak ami hatutan ba MSSI”, haktuir Diretór Jerál Dezentralizasaun Administrativu MAE ne’e.

Maske nune’e, Diretór Jerál MSSI, Rui Exposto Gago, informa, ministériu halo ona pagamentu ba lista reklamante, maibé ba benefisiáriu sira ne’ebé nafatin seidauk hetan direitu nia parte rejeita fó komentariu, ho razaun antes ne’e Vise MSSI Interina, Signi Chandrawati Verdial deklara sei laiha tan pagamentu ba faze datoluk.

“Ha’u lakohi halo komentáriu ba ida ne’e, tanba ita boot sira akompaña iha loron 5, fulan ne’e, eselénsia Vise Ministra iha momentu ne’ebá hanesan Ministra Interina dehan, pagamentu ne’e pagamentu finál ne’ebé provizoriumente, ha’u lakohi komentáriu ba ida ne’e, sé dezisaun oin seluk, ne’e oin seluk fali, ha’u sei lakohi tama to’o iha ne’ebá”, dehan Rui.

Tuir Diretór Jerál MSSI, restu orsamentu ne’ebé iha MSSI sei devolve ba kofre Estadu, tanba fundu ne’e Estadu nian.

Pagamentu ba lista reklamante iha teritóriu tomak Governu aprova fundu ho montante USD tokon 2 resin no ohin finaliza ona pagamentu ba benefisiáriu sira iha kapitál Díli.

Tuir dadus husi MAE no MSSI númeru reklamante iha kapitál Díli, suku Comoro boot liu kompara ho suku sira seluk. ina

Lee hotu :   ANC husu TT, Telemor-Telkomcel dezliga númeru ne’ebé la rejista

Add to Comments Here!!!!

error: Content is protected.
Secured By miniOrange
You might also like:
Vise MI rejeita ezonera KomJer PNTL

Vise Ministru Interior (MI), António Armindo,...

MOP: Problema Traballadór Seguransa Lorosa’e resposanbilidade kompañia

Ministériu Obras Públika (MOP) konsidera problema...

Arguidu rua husi Liran TECK submete ona ba PI

Polísia Nasionál Servisu Investigasaun Kriminál (PNSIK)...

Close