Governu aprova pagamentu saláriu désimu terseiru ba FP

Governu aprova projetu dekretu lei kona-bá pagamentu saláriu désimu terseiru fulan ida ba sira ne’ebé servisu hanesan Funsionáriu Públiku (FP) no Funsionáriu Kontratadu (FK) administrasaun públika.

“Ministra Finansa ein ezersísiu, Sara Lobo Brites aprezenta ona projetu dekretu-lei ne’ebé aprova husi Konsellu Ministru (KM) kona-bá pagamentu estraordináriu husi saláriu adisionál fulan ida ba funsionáriu, ajente no kontratadu sira administrasaun públika nian”, Ministru Prezidénsia Konsellu Ministru (MPKM), Fidelis Leite Magalhães, iha Palásiu Governu, Sesta (20/11/2020).

Porta Voz Governu ne’e subliña, Governu sei la halo pagamentu saláriu desimu terseiru ne’e ba funsionáriu kontratadu sira ne’ebé simu saláriu USD rihun 5, inklui funsionáriu kontratadu estranjeiru sira.

“Abranje husi pagamentu estraordináriu ida-ne’e ba funsionáriu no ajente administrasaun públika nian sira, exetu funsionáriu kontratadu sira-ne’ebé ho saláriu hanesan USD rihun 5 no funsionáriu kontratadu estranjeiru sira”, tenik Fidelis. cin