Komisaun C nota dokumentu proposta OJE 2021 barak errata

Komisaun C ne’ebé trata asuntu Finansa Públika iha Parlamentu Nasionál (PN) nota dokumentu proposta lei Orsamentu Jerál Estadu (OJE) tinan 2021 barak errata, tanba mudansa sistema, maibé normál Governu aprezenta OJE sempre iha errata signifika koresaun ruma Governu tenke hadi’a.

“Ita hotu hatene proposta lei OJE 2021 Governu submete iha PN 15 de Outubro, tinan ne’e, tuir rejimentu ita hala’o durante fulan ida debate, jeneralidade loron 3 no loron 7 espesialidade no finál globál. Maske durante ne’e komisaun C PN deteta erreta barak dokumentu orsamentál proposta lei la’ós tanba Governu laiha kapasidade, maibé mudansa sistema no proposta lei OJE 2021, orsamentu mai ho pur programa Governu halo errata karik iha númeru mak sala no mós orsamentu pur programa nia númeru mak sala iha alokasaun“, Deputada bankada FRETILIN, Maria Angélica dos Reis ba jornalista sira iha PN, Sesta (27-11-2020).

Deputada bankada FRETILIN ne’e akresenta, komisaun C deteta dokumentu orsamentál errata barak ne’e normál, tanba orsamentu ne’e la hanesan bai-bain, maibé orsamentu kada programa liu-liu errata iha alokasaun orsamentu.

“Errata tanba mudansa sistema uluk orsamentu mai ho nia órgaun sira, maibé orsamentu 2021 iha tabela II deputadu sira atu aprova ne’e kada programa, tanba ne’e mak iha kestaun téknika barak tenke hadi’a hodi hamosu errata“, dehan Maria Angélica.

Entretantu Governu submete OJE tinan 2021 ba PN iha loron 15, fulan Outubru, hamutuk USD billiaun 1.895.

Tuir planu PN sei hahú debate proposta OJE tinan 2021 jeneralidade iha semana oin. ety