MSSI devolve restu subsídiu USD 200 ba kofre Estadu

Pagamentu subsídiu USD 200 iha primeira faze Ministériu Solidariedade Sosiál no Inkluzaun (MSSI), devolve hikas restu fundu ba kofre Estadu.

Pagamentu subsídiu familiár ne’ebé Governu implementa liu husi MSSI implementa iha fulan Juñu, tinan 2020 ba kada uma-kain, MSSI devolve hikas restu orsamentu ne’ebé iha ba kofre Estadu no sei devolve mós restu osan iha pagamentu ba lista reklamante iha segunda faze.

Apoiu agregadu familiar ne’e, Oitavu Governu Konstituisionál implementa relasiona ho surtu COVID-19 ne’ebé mosu iha Wuhan, Sentru Hubei Xina, fim tinan 2019, hodi afeta saúde ema nian no destroi ekonomia mundiál no mós Timor-Leste.

“3.4 ita devolve ona ba kofre Estadu antes ita halo pagamentu ba reklamante sira, primeira faze ita rezolve tiha uluk ida ne’e, agora ida ne’e mós hanesan kuandu la hotu pagamentu reklamasaun ba reklamante balun la simu devolve hotu ba kofre Estadu, ne’e sistema no mekanizmu iha ona ita hein la’o de’it ne’ebé labele dúvida no osan ne’e sei la lakon no ema ida labele book tan osan ne’e ida-idak kontrola osan ne’e, ami mós kontrola hela”, Diretór Jeral MSSI, Rui Exposto Gago ba GMN iha ninia kna’ar fatin CaiColi-Díli, Sesta (15/01/2021).

Pagamentu ba lista reklamante MSSI finaliza ona ba munisípiu 12 no hela de’it Oe-Cusse mak seidauk halo pagamentu ba reklamante sira, tanba iha hela situasaun lockdown, maibé MSSI sei halo pagamentu hafoin lockdown. ina