Lere husu UNISMA kumpri regra

Xefe Estadu Maior Jeneral FALINTIL –Forsa Defeza Timor-Leste (F-FDTL) Major Jeneral Lere Anan Timur, husu ba grupu kooperativa UNISMA Pro-RDTL atu kumpri regra no lei ne’ebé mak vigora iha nasaun República Democrática de Timor-Leste.

Lere Anan Timur hato’o lia hirak ne’e, relasiona ho pedidu  organizasaun UNISMA  ne’ebé mak hato’o ba komando PNTL hodi hasa’e bandeira RDTL iha sira nia sede  iha ámbitu  komemorasaun loron proklamasaun independensia RDTL 28 Novembru.

Lere dehan, UNISMA nia  organizasaun furak tebes, tanba  organizasaun ne’ebé mak úniku  tanba la kria problema, iha inisiativa  halo kooperativa.

 “Maibé imi dada bandeira  iha Timor Estadu ketak halo nusa”,dehan Lere,

Lere hateten,   organizasaun UNISMA, iha legalidade no estatutu hodi existi iha nasaun ne’e, maibé grupu sira ne’e ezisti atu hala’o atividade sosiais hanesan kooperativa, la signifika  grupu sira ne’e hasa’e bandeira mesak iha loron nasionál  iha 28 Novembru,

“Ha’u hateten bebeik  imi UNISMA nia  organizasaun furak tebes-tebes, ema atu fiar imi ne’e, imi ténki tuir regra  no lei sira ne’e”,esplika Xefe Estadu Maior Jeneral FALINTIL –Forsa Defeza Timor-Leste (F-FDTL) Major Jeneral Lere Anan Timur, ba jornalista sira  hafoin partisipa  seremonia komemorasaun 28 Novembru Kinta (28/11/19) iha palasiu governu.

Lere dehan, organizasaun UNISMA uniku iha Timor, tanba nunka halo problema no  iha inisiativa halo koperativa, maibé imi dada bandera.

 “Imi UNISMA dada bandera ketak ne’e Estadu ketak halo nusa”,dehan Lere.

Alende ne’e Komandante jerál PNTL Komisáriu Faustinho da Costa rekoñese organizasaun UNISMA iha legalidade no estatutu hodi existi iha nasaun ne’e.

 “Maibé grupu sira ne’e ezisti atu hala’o atividade sosiais hanesan koperativa, la signifika  grupu sira ne’e hasa’e bandeira mesak iha loron nasionál  iha 28 Novembru”,dehan Faustino da Costa.avi