Ema sona negosiante ida iha Taibessi to’o mate

Ernesto dos Santos  idade 24 (vítima), orijin husi suku Bere-Leu, postu administrativu Lequidoe, munisípiu Aileu, nu’udár negosiante ida hetan sona husi suspeitu LS no JA iha hirus matan parte loos to’o nia hakotu iis.

Kazu ne’e akontese iha fatin estasionamentu transporte públiku Taibessi, postu administrativu Nain-Feto munisípiu Díli.

Tuir informasaun ne’ebé Polísia rekolla husi sasin  ida katak, antes ne’e nia haree suspeitu LS no JA hemu tua hamutuk iha fatin estasionamentu Taibessi, nune’e sira ho kondisaun lanu todan.

Wainhira vítima Ernesto liu husi fatin refere sama sala agua mamuk ida tarutu, suspeitu sira ameasa vítima  no kaer tudik hodi sona kedas ba vítima nia hirus matan no monu-tun iha fatin.

Nune’e sasin ida ne’e ho nia mane foun hi’it vítima lori ba iha postu Polísia Merkadu Taibessi, hodi kontinua transporta ba Hospital Nacional Guido Valadares (HNGV), maibé doutór sira labele salva vítima nia vida, tanba vítima kanek todan.

Mate-isin dau-dauk ne’e sei rai hela iha mortuáriu no tuir planu Segunda semana ne’e foin halo autópsia.

Hafoin akontese kazu refere suspeitu JA tenta hala’i husi Taibessi atu ba Maliana, maibé Polísia Eskuadra Nain-Feto simu informasaun husi sasin hodi duni tuir suspeitu no kaptura iha Tasi Tolu, postu administrativu Cristo-Rei, nune’e dau-daun ne’e detein iha sela detensaun Caicoli-Díli.

Polísia mós identifika suspeitu JA kanek iha ain loos no karuk.

Entretantu suspeitu seluk ho inisiál LS, tenta hala’i subar-an husi Polísia. avi