Lere: Governu labele abandona populasaun iha baze

Xefe Estadu Maior Jeneral FALINTIL-Forsa Defeza Timor Leste (F-FDTL), Majór Jeneral Lere Anan Timur, preokupa ho autoridade lokal hanesan Xefe suku no Xefe aldeia atu halo kontrolu ba populasaun sira, hodi garante estabilidade, tanba ne’e husu Governu labele abandona populasaun iha baze.

“Ami-nia preokupasaun nu’udar responsabilidade ba seguransa nasional, ami hato’o mos ba Prezidente Repúblika katak, Governu tenke ukun to’o baze ka to’o kraik, labele abandona iha kraik, preokupa deit iha leten, porque ami haree ba ne’e koalia kona-ba estabilidade nasional tenke mai husi baze”, dehan Lere Anan Timur ba Jornalista sira, Kuarta (25/11/2020), iha Palásiu Prezidensial Nicolau Lobato, Bairo-Píte, Díli.

Lere hatutan, Xefe suku tenke kontrola nia suku no Xefe aldeia tenke kontrola nia aldeia. Maibe to’o agora, nia haree ba Xefe suku sira kuaze iha nível nasionál, la’ós hotu-hotu, maibe barak laiha responsabilidade, Xefe aldeia mos laiha responsabilidade, tanba laiha ema ida husu responsabilidade ba sira.

“Ezemplu ha’u hanesan Komandante Jeral Forsa Armada ninian, ha’u semana-semana hala’o reuniaun ho ha’u-nia komandante komponente sira, ha’u husu responsabilidade ba sira, sira tenke kontrola ida-idak ninia komponente, komandante hotu-hotu ita koñese ninia soldadu, koñese soldadu ne’e servisu diak ka lae, ninia familia moris diak ka lae”, realsa Lere.

Lere  akresenta, Xefe suku sira balun mai pasiar hela iha Díli, buka bussiness ka tender bainhira mak atu manan, bele dehan Timor-Leste ukun-an ona ida-idak moris tuir nia hakarak, tanba ne’e, preokupasaun ne’ebé  hato’o hela ba Prezidente Repúblika, ema hotu-hotu asume kargu Estadu no Governu nian,tenke asume mos nia responsabilidade.

“Hanesan ha’u seguransa nian, ha’u tenke iha seguransa, ha’u kumpre devér nu’udar seguransa,  kuandu ha’u hamriik iha seguransa ha’u la haree ba oin ó mutin ka ó metan, no ó boot ka o kiik, ha’u kumpri ha’u devér nu’udar seguransa, ita Timor ukun-an 20 anos ona, ne’e la’ós foin mak ukun-an tinan ida, tinan rua, ita presiza atu hadia, ami husu mos ba Prezidente Repúblika, ne’e última faze ukun Timor ba ita mak ne’e ona, tuir mai jerasaun foun mak ukun ona, mas ita kuandu la haloos buat sira ne’e, abanbainrua ita sei sai sabraut”, tenik líder máximu Instituisaun F-FDTL ne’e. Oly