Prosesu judisiáriu kleur, halo labarik sira sai vítima

Komisária Nasionál Direitu Labarik (KNDL), Dinora Granadeiro, konsidera, prosesu judisiáriu ne’ebé la’o kleur fó impaktu ba edukasaun labarik sira ne’ebé sai vítima iha kazu ruma.

“Ita mós dalabarak foti kestaun ne’e, tanba prosesu justisa jusidiáriu ne’ebé la’o kleur, ita rekoñese situasaun ne’e afeta ba alin sira asesu edukasaun, ita tenta hela mekanizmu balun hodi fasilita”, KNDL ne’e hafoin partisipa atividade selebrasaun loron mundiál labarik ne’ebé hala’o iha Fundasaun Forum Komunikasaun Juventude (FCJ), Balide-Díli, Sesta (20-11-2020).

Nia esplika, iha uma mahon balun fó espasu hodi muda labarik sira ba eskola ne’ebé besik ba uma mahon, nune’e sira bele kontinua eskola, maibé fó prioridade ba sira ne’ebé bele la’o ho seguru.

Enkuantu ba labarik sira ne’ebé iha kazu grave tenke hela metin iha uma mahon no labele kontinua eskola, tanba la seguru hodi halo movimentu wainhira suspeitu sei livre.

“Loos duni labarik sira iha situasaun ho konflitu dalabarak sira tenke hakmatek iha uma mahon, tanba família ne’ebé tuir loos sai fatin fo protesaun máximu no fatin sente seguru ne’ebá família rasik mak halo aktu krime hasoru labarik”, tenik Dinora. 

KNDL ne’e mós subliña, durante ne’e sira labele defende maka’as labarik sira, tanba lei protesaun labarik ne’e rasik sei kaduka iha Parlamentu Nasionál (PN), iha tinan 2018.

“Ita mós esforsu ho komisaun ba traballu infantil prepara esbosu dekretu lei, hodi regula labarik ne’ebé halo servisu iha estrada no ho nia planu asaun ruma”, dehan nia.

Tuir Dinora, wainhira lei ne’e legál ona mak KNDL bele iha espasu hodi kontinua halo kampaña no sensibilizasaun ba komunidade atu hatene dever inan-aman no sosiedade, hodi proteje di’ak liu labarik sira. ida