Suspeitu asalta kareta espoza PM, Detein oras 72 hodi aprezenta ba TDD

Suspeitu na’in haat ne’ebé asalta kareta espoza Primeiru Ministru (PM), Isabel Ferreira detein oras 72, hodi aprezenta Primeiru Interogatóriu (PI) iha Tribunál Distritál Díli (TDD).

“Ha’u atu informa katak, loos duni akontese iha  iha Kuarta loron  2, fulan Novembru, mais ou menus tuku 6 ho balun dadersan  iha aldeia 17 de Abríl, suku Metiaut, iha duni grupu ida iha ema na’in haat ho kondisaun lanu momentu ne’ebá, wainhira  kareta espoza sua exelénsia Primeiru Ministru (PM) ho nia kareta atu tuir misa iha Bidau, maibé hetan impedimentu husi joven sira ne’e, husi sira na’in haat ne’e iha na’in ida mak hakat mai hapara kareta no baku kapon, tenta atu loke odamatan, maibé xave hela. Tanba ne’e Polísia halo ona kapturasaun ba suspeitu na’in haat ne’e hodi detein oras 72 iha sela detensaun Caicoli-Díli atu bele aprezenta ba iha tribunal”, Komandante PNTL munisípiu Díli, Superintendente Xefe Henrique da Costa ba  jornalista sira iha Kuartel Polísia Caicoli-Díli, Kinta (03/12/2020).

Suspeitu na’in haat ne’ebé envolve iha kazu refere ho inisiál FDA, AN, DM no OB.

Tuir observasaun GMN, durante atuasaun ba suspeitu sira, Polísia Eskuadra Cristo Rei utiliza sira nia kareta no kombustivel  privadu, hodi buka tuir suspeitu sira iha ida-idak ninia rezidénsia.

L7 lamenta ho atitude joven sira nian

Nuneé mos, deputadu bankada PLP, Cornelio Gama “L7”, lamenta ho atitude joven hirak ne’ebé mak asalta kareta espoza Primeiru Ministru (PM), Taur Matan Ruak.

“Grupu joven ida asalta kareta espoza PM nian ne’e konsidera oinsa, ida ne’e hanesan uluk ema buka ami hodi oho ami, agora komesa ona armadila ba ami veteranu 24 anos, ida ne’e komesa ona haree malu la di’ak no matan la moos ona, ne’e la konsidera ami. PM loron-kalan tun husi dalan ne’e ema koñese hela, maibé oinsa halo fali hanesan ne’e, tanba ne’e Vise Ministru Interior (MI) tenke tau atensaun ba ida ne’e, sé la’e sai pontu interogasaun. Ami-nia fen no oan sira iha Atauro ema halo aat loos, agora imi halo fali ami hanesan ne’e, ne’e ami la konkorda, ida boot liu mak imi halo hanesan ne’e, abanbainrua imi halo ba Xanana, Lere, Mari, Ramos Horta, estraga ami veteranu de’it. Ami la konkorda ho atitude hirak ne’e, tanba lideransa hirak ne’e sai hanesan patrimóniu Estadu. Ami mate-restu ami la tauk ema ida, ami prontu mate, maibé ami la konkorda bainhira imi halo hanesan ne’e ba ami nia aman sira, ami hanesan patrimóniu ida, imi bele hemu tua, maibé tenke respeitu ema”, dehan L7 iha Parlamentu Nasionál (PN), Kinta (03/12/2020).

Hatán ba kestaun ne’e, PM, Taur Matan Ruak, hateten, joven hirak ne’e lanu no joven hirak ne’e mai husi bairu seluk.

“Ha’u hanoin kazu ne’e, tamba alin sira ne’ebé aborda baku kareta ne’e lanu no joven sira husi fatin seluk mak ba iha ne’ebá, la’ós bairu ami nian. Ha’u mós hakfodak sai iha jornál infelismente ida ne’e akontese, mas ha’u hanoin katak ne’e la’ós normál, ita tenke rekoñese katak kontribuisaun joven sira nian, iha fatin-fatin pelu faktu ita-nia númeru joven ne’e boot liu no númeru krime ne’e tun, signifika sira nia kontribuisaun ne’e maka’as, ita tenke elójia ida ne’e mezmu ke ita reprova sira ne’ebé lanu. Ha’u mós abordanu dala ida, tanba sira lanu, mas ha’u ho seguransa tun ba hakalma sira, maibé ha’u nia kaben tanba atu ba misa ninia kandutór apitu alarma kuaze ha’u nia seguransa sira alarma polísia sira no kazu ne’e sai tiha outro do mundo”, tenik Xefe Governu ne’e. avi/cin