MD: Pesoál instituisaun balun fasilita ema tama-sai ilegál

Ministru Defeza (MD), Filomeno Paixão, hatete, pesoál balun husi instituisaun determinada fasilita ema tama ilegál husi liña fronteira. Nune’e nia parte husu atu kria ekipa Task Force ne’ebé envolve ministériu hotu hodi kontrola di-di’ak liña fronteira sira atu bele halo seguransa ida sériu, labele hein de’it reforsu husi F-FDTL no PNTL.

“Imi hatene katak iha fulan kotuk ita rona bapa nia liafuan dehan katak, pagar makan tanaman sira lubuk ida husi instituisaun determinada husik ema tama, sira mak husik ema tama. Ita preokupa loos, ita ba hein iha ne’ebá hanesan halo lutu, maibé lutu mak loke-an para ema tama, ida ne’e problema tenke rezolve la-lais mak ida ne’e. La’ós de’it ba reforsa, ita ba reforsa ho ema, depois nia mak loke lutu para ema tama problema ida ne’e tenke haree muito sério. Para depois ita hotu nia servisu ne’e bele hetan rezultadu, sé mak hakarak hetan moras, sé mak hakarak oho-an”, MD ne’e hafoin hasoru malu ho Prezidente Repúblika (PR), Fransisco Guterres Lú Olo, Segunda (25/01/2021).

Governante ne’e apela mós ba sidadaun sira atu kontribui nafatin hodi garante seguransa iha fronteira, nune’e bele evita propagasaun COVID-19. Tanba servisu seguransa no defeza la’ós de’it servisu membru F-FDTL no PNTL nian de’it. oct