Governu Cuba kontinua apoiu TL

Governu Repúblika Cuba kontinua hametin lasu amizade ho Governu Republika Demokratika Timor Leste (RDTL), ho komomitmentu apoiu kapasitasaun ba rekursu umanu ba dezemvolvimentu Timor-Leste (TL) iha área saúde, agrikultura no edukasaun.  

Kompromisu hirak ne’e realiza, hafoin hala’o enkontru  bileteral ho Ministro de Estado Presidência do Conselho de Ministros Hermenegildo Augusto Cabral Perreira ho Vise Ministru Negosiu Estranjeiru no Kooperasaun Repúblika Cuba, Marcelino Medina.

Ministro de Estado Presidência do Conselho de Ministros, Hermenegildo Augusto Cabral Perreira, hateten, Governu Repúblika Cuba ho komitmentu kontinua apoiu hodi kapasita rekursu umanu Timor-Leste iha aspetu saúde, edukasaun no agrikultura.

“Cuba nia tarjetu mak fo formasaun ba Timor-oan, spesialista rihun ida, no ita besik ona to’o ona rihun ida, haree tok ba oin ne’e atu kontinua oinsa, fo hanoin mos ba ministru Cuba fo mos formasaun  ba tinan 20-25 ne’e ba Timor-oan ba setor agrikula nian, husu ba Cuba dalan oinsa tanba ne’e multiplika ba dezenvolvimentu TL”,dehan Hermenegildo Augusto Cabral Perreira ba Jornalista sira iha Palásiu Governu , Kinta (11/10/2018).

Iha fatin hanesan, Vise  Ministru Negósiu Estranjeiru no Kooperasaun (MNEK) Repúblika Cuba,  Marcelino Medina, hatete, kompromisu ne’e nu’udar tarjetu husi Governu Cuba hodi kontinua apoiu Timor-Leste.

“Enkontru bilateral ida ne’e hodi aprofunda liutan kooperasaun bileteral nasaun rua Cuba ho Timor-Leste iha Azia Pasífiku, ne’ebé mak komandante Fidel Castro forma ona espesialista atus ida Timor-Leste iha Cuba”,hatete Marcelino Medina.

Vise MNEK Cuba ne’e dehan, kooperasaun bileteral iha futuru, la’os deit apoiu iha aspetu saúde nian, maibe apoiu mos iha aspetu Edukasaun, Agrikultura, Industria Farmasia no dezemvolvimentu ba Aeroportu.

Marcelino Medina mos agradese ba Governu Timor-Leste liu husi kooperasaun bilateral no espesial ba Ministru, Hermenegildo Augusto Cabral Perreira, ne’ebé Governu TL fó konfiansa bele realiza enkontru biltateral ne’e.

Vise MNEK Cuba ho komitiva to’o iha Aeroportu Internasional Nicolau Lobato-Díli, tuku 01:30 Oras Timor Leste ho Aviaun Sriwijaya no simu husi protokolu MNEK.Eus