JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

FRETILIN rekoñese hadau podér

FRETILIN rekoñese hadau podér

Deputada bankada FRETILIN, Dario Madeira, rekoñese hadau podér hodi viabiliza VIII Governu ne’ebé lidera husi Primeiru Ministru (PM), Taur Matan Ruak, hafoin Orsamentu Jerál Estadu (OJE) xumba iha Parlamentu Nasionál (PN).

“FRETILIN ba hadau podér, sim FRETILIN halo duni buat ida ne’e para povu atu moris di’ak, viabiliza Governu ida ne’e para povu atu moris di’ak. Ha’u ko’alia ida ne’e FRETILIN viabiliza VIII Governu hakarak funsionamentu Estadu nian la’o, povu tenke moris hakmatek funsionáriu simu osan fulan-fulan. FRETILIN hakarak viabiliza Governu, tanba hakarak povu nia produtu lokál iha área rurál sira ema bele sosa hodi hetan osan hadi’a sira-nia moris, hodi eduka nia oan sira, maibé ohin mai iha ne’e hatudu liman ba malu“, deklara deputadu FRETILIN ne’e liu husi ninia intervensaun iha PN, Segunda (19-10-2020).

Ba deklarasaun ne’e, deputadu CNRT, Gabriel Soares fó parabéns ba deputadu bankada FRETILIN, Dário Madeira ne’ebé rekoñese katak atu hetan ukun lori povu ne’e ba oin tenke hadau podér hodi forma Governu ida.

“Atu responde ba akuzasaun husi bankada FRETILIN nian katak, “CNRT iha situasaun Post Power Syndrome”. Post Power Syndrome ne’e saída? Post Power Syndrome ne’e nu’udár moras psikolójika, tanba lakon podér ka pozisaun ruma, sai tiha horis sintoma halo ema difísil atu sees husi ninia realidade lakon ona podér. Hanesan koligasaun, Aliansa Mudansa ba Progresu manan eleisaun antesipada ne’ebé Prezidente partidu FRETILIN dekreta liu husi Presidençia-República, fásil tebes ba CNRT, sé kanten podér “karik” husik hela violasaun konstitusionál la’o de’it, importante mak CNRT ukun. Sé CNRT kanten podér no tauk atu lakon podér “karik” sei la eskolla PM ne’ebé la’ós husi CNRT. Ne’e dehan saída? CNRT aposta ba interese Estadu no podér nu’udár instrumentu de’it atu konkretiza vizaun boot ba soberania paiz no dezenvolvimentu ba ita-nia povu doben”, tenik deputadu bankada CNRT ne’e.

Nia akresenta, FRETILIN sempre orgullu taka sira-nia Gânancia ba Podér hodi fó sala bei-beik ba CNRT, insulta ho liafuan oi-oin, maske sira kaer dau-daun hela ukun ho dalan viabiliza “tongka-tongka” VIII Governu ne’ebé iha tinan 2018 sira vota kontra koligasaun AMP nia programa, inklui vota kontra OJE tinan 2018, orsamentu iha tinan 2019 no orsamentu 2020 iha fulan Janeiru, tinan 2020.

“Ohin loron, baibain ona, partidu FRETILIN hakarak hatudu-an sai tiha anju deklara salva Estadu ho razaun katak lakohi mosu Eleisaun Antesipada (EA). FRETILIN konsidera EA sai buat ida ne’ebé TABOO ka proibidu atu akontese iha Timor-Leste. Enkuantu iha tinan 2018, ne’ebé tuir loloos labele akontese EA, tanba partidu tolu asegura hela maioria parlamentár iha PN, maibé Prezidente FRETILIN, Francisco Guterres “Lú Olo” deklara EE hanesan solusaun úniku atu salva FRETILIN nia inkapasidade ne’ebé falla atu forma Governu ne’ebé seguru no forte. Iha altura ne’ebá maske CNRT hamutuk ho nia aliadu PLP ho KHUNTO iha kadeira 35 ho maioria parlamentár, maibé koligasaun ida ne’e la halo asaltu podér hanesan saída mak fretilin orkestra hodi akontese iha loron 19, fulan Maiu, tinan 2020. Ida ne’e hatudu katak, CNRT sempre kumpre konstituisaun no la’ós ambisiozu no la kanten ba podér ka sofre moras Post Power SYNDROME”, tenik deputadu Gabriel.

Deputadu opozisaun ne’e afirma tan, FRETILIN nia moras Post Power Syndrome ida ne’e mak dudu FRETILIN halo violasaun ba konstituisaun hodi harí VII Governu minoria no dudu FRETILIN halo asaltu podér iha PN hodi hamosu VIII Governu Tongka-Tongka ka ho termu Viabiliza ne’ebé la hakerek iha konstituisaun RDTL.

“Sintoma no sofredór ba Post Power Syndrome hatudu mós husi negasaun partidu FRETILIN nian ba realidade dezenvolvimentu sosio-ekonómiku no kulturál paíz ida ne’e nian dentru tinan 10 nia laran. Sei fresku hela iha ita-nia memória, hafoin mosu krize boot iha tinan 2006, Timor-Leste monu ba iha situasaun difísil tebes, Timor-Leste sai nasaun frájil. Graças a Deus hamutuk rai-lulik no matebian sira no Maun Boot Kay Rala Xanana Gusmão, CNRT rekupera hikas situasaun krize polítika no militár iha de’it dentru tinan-rua nia laran. Nune’e iha tinan 2009 refujiadu rihun-atus ba atus lori hikas ba sira-nia uma, fó pensaun no subsídiu ba veteranu sira, subsídiu ba konfísoens relijiozu ne’ebé ema balun uluk nega sira-nia partisipasaun ba luta libertasaun nasionál, ferik-katuas simu subsídiu, bolso de mãe, bolso de estudus ba Timor-Oan sira liu husi Fundu Dezenvolvimentu Kapitál Umanu, subsídiu ba universidade públiku no privada, harí sentru kulturál, projetu empregu rurál, infraestrutura eskola, sáude, eletrisidade, irigasaun, estrada no seluk-seluk tán”.

“Polítika ida-ne’e mak manifesta planejando com base na humanidade, ema sai sentru ba dezenvolvimentu sosio-ekonómiku no kulturál. La’ós liafuan mamuk! Balun uluk loko-an mesak fundadór hotu de’it, nega ninia povu terus na’in, agora tau-an hanesan sai anju ba defensór povu nian. Partidu FRETILIN halo propaganda polítika bosok hodi halo beik ita-nia povu, nune’e atu desvia atensaun públiku kona-bá orsamentu ne’ebé boot no Governu ne’ebé bokur demais atu aproveita susu-mohu Fundu Petrolíferu ba despeza la nesesáriu sira mak hanesan, liu USD 78 milhões atu finansia rekrutamentu polítika iha rúbrika tékniku profisionais nian, inventa alargamentu ba estrutura Governu ho Vise PM na’in-rua kedas, aumenta ho Ministru Koordenadór sira, aumenta ministru lubuk tán, alokasaun osan ba RAEOA ne’ebé sei segredu no barak tan. Ne’e atu mostra tan Governu ida ne’e hatudu ninia diferénsia, loos duni, alénde kanten, FRETILIN hatudu mós ninia Gânancia ba Podér no Osan”, subliña Gabriel.

Entretantu iha plenária Segunda (19/10) semana ne’e, deputadu sira hatán malu ho lian maka’as no kuaze deputadu barak mak sai tiha, antes ministru responde preokupasaun ne’ebé levanta husi deputadu sira.

Entantu iha loron 17, fulan Janeiru, tinan ne’e, bankada CNRT fó votus abstensaun ba OJE 2020 ne’ebé xumba iha PN. Ho nune’e bankada PLP no bankada KHUNTO, hamosu konjuntura polítika foun ida ho partidu FRETILIN hodi viabiliza VIII Governu konstituisionál ne’ebé lidera husi PM, Taur Matan Rauk. ety/ say

Lee hotu :   PM Taur Matan Ruak: PR laiha razaun la fó posse ba membru governu nain sia

Add to Comments Here!!!!

error: Content is protected.
Secured By miniOrange
You might also like:
Projetu 143 laiha kontratu, PJR husu Governu lalika halo pagamentu

Prokuradór Jerál Repúblika (PJR), José da...

PJR husu Governu hasai direitu veteranu ne’ebé falsifika dokumentu

Prokuradór Jeral Repúblika (PJR), José da...

PR Lú Olo promulga ona OJE 2020

Prezidente Repúblika (PR), Francisco Guterres “Lú...

Close