Governu deside husu ba PR estende tan EE ba daualu

Governu liu husi reuniaun Konsellu Ministru (KM), Kuarta (25/11/2020) delibera atu propoin ba Prezidente Repúblika (PR), Francisco Guterres “Lú Olo” renovasaun Estadu Emerjénsia (EE) ba loron tolu-nulu tan. Governu hasa’i desizaun ne’e haree ba mudansa preokupante husi situasaun epidemiolójika no proliferasaun ba kazu rejistadu husi kontájiu COVID-19, iha nível rejionál no mós mundiál, atu evita no neutraliza risku sira husi propagasaun corona vírus foun.

“Governu deside atu husu dala ida tan estensaun ba EE husi PR. Governu delibera ona, depois Primeiru Ministru (PM) sei haruka karta ba Xefe Estadu. Hanesan ita hotu hatene ona no iha espetativa ida katak PR sei konvoka reuniaun sira no mós Governu mós sei ba iha Parlamentu Nasionál hodi hatán bainhira pedidu ne’e to’o ona iha Parlamentu Nasionál”, hateten Ministru Prezidénsia Konsellu Ministru (MPKM), Fidélis Magalhães.

Tuir Governu, ho estensaun EE ne’e bele proteje saúde públika no iha kbi’it atu hatán ba Sistema Nasionál Saúde.

Liu husi renovasaun EE permite atu suspende ka limita direitu kona-bá sirkulasaun internasionál, sirkulasaun no fiksasaun rezidénsia no rezisténsia.

Entretantu dau-daun ne’e Timor-Leste sei aplika hela EE dahitu ne’ebé sei remata iha loron 3, fulan Dezembru ne’e. Oct