MTK seidauk prontu fó deklarasaun kona-bá dentensaun ba jerente Telemor-Elite Computer

Ministru Transporte no Komunikasaun (MTK), José Agostinho da Silva, seidauk prontu atu ko’alia kona-bá detensaun ba Jerente Prinsipál Telemor no Elite Computer ne’ebé halo husi Servisu Investigasaun Kriminál Polísia Nasional Timor-Leste (SIK-PNTL) ne’ebé deskonfia komete kazu burla informátika no fraude fiskál, hodi forñese rede internet ilegál mai Governu no mós Polísia Nasional Timor-Leste (PNTL).

“Pois mak ha’u fó sai. Ha’u labele ko’alia uluk informasaun ne’ebé sei fó sai husi Ministru Prezidénsia Konsellu Ministru (MPKM). Ha’u disponível kualker momentu para atu fó informasaun. Ha’u labele mendahului fali MPKM”, MTK ne’e hafoin reuniaun Konsellu Ministru (KM), Kuarta (25-11-2020).

Iha loron 23, fulan ne’e SIK-PNTL kaptura ona suspeitu ho insiál TVB iha edifísiu Telemor iha Timor Plaza CBD andar 3 no iha loron hanesan kaptura mós suspeitu ho inisiál DP iha ninia servisu fatin Colmera-Díli. Kapturasaun ne’e halo bazeia despaixu Tribunál Distritál Díli nian, relasiona ho kazu burla informátika no fraude fiskál, tanba servisu hamutuk hodi forñese rede internet ilegál ba Governu no mós ba PNTL.

Entretantu, Telemor hanesan operadór telekomunikasaun ida no Elite Computer hanesan empreza forñesedór servisu internet iha país ne’e.

Iha Tersa, semana ne’e SIK kontinua halo buska ba sala sistema sentrál kompañia Elite Computer iha Colmera-Díli no deside hakotu rede internet no rekolla dadus kliente sira ne’ebé durante ne’e hetan forñesimentu internet husi Elite Computer. Oct