PM Taur: Orsamentu adisionál ba Ró Haksolok depende desizaun PN

Primeiru Ministru (PM), Taur Matan Ruak, hateten, orsamentu adisionál ne’ebé Autoridade Rejiaun Administrativu Espesiál Oe-Cusse Ambeno (RAEOA) propoin ba Ró Haksolok ne’e depende ba desizaun husi Parlamentu Nasionál (PN).

“Ha’u hanoin diskusaun ne’e sei halo iha Parlamentu, ne’e só PN mak deside katak osan ne’e kontinua ou hasa’i ne’e iha PN. Autoridade RAEOA sira hanoin katak para kontinua prosesu ne’e la’o ba oin tenke tau osan”, Xefe Governu ne’e bainhira remata enkontru semanál ho Xefe Estadu, Francisco Guterres “Lú Olo”, iha Palásiu Prezidensiál Nicolau Lobato, Bairro Píte, Kinta (26/11/2020).

Líder Ezekutivu ne’e informa, ne’e depende ba desizaun husi membru PN, la’ós Governu mak deside, tanba ne’e autoridade ida nia finanseiru.

“Agora ba PN sira mak sei deside, ate la’ós tan Governu mak deside, tanba ne’e autoridade ida nia iha autonómia finanseira”, tenik Taur.

Antes ne’e, Governu aloka osan USD tokon 14 ba akizisaun Ró Haksolok, maibé la konsege finaliza.

Tanba ne’e, iha tinan 2020 autoridade RAEAO propoin tan osan USD tokon 14, hodi finaliza konstrusaun no mós USD tokon 2 ba konstrusaun pontoens.

Iha totalidade, projetu konstrusaun Ró Haksolok ne’e presiza tan osan USD tokon 16 ne’ebé sei foti husi Orsamentu Jerál Estadu tinan 2021. cin