PR apela ba Timor-oan sira tenke badinas dezenvolve Timor-Leste

Prezidente Repúblika (PR), Francisco Guterres “Lú Olo”, hateten, komemorasaun loron proklamasaun independénsia ba da-45 fó hanoin kona-bá luta eroi sira-nian iha tempu naruk to’o hetan independénsia. Tanba ne’e nia  apela ba Timor-oan hotu atu iha sentidu nasionalizmu hodi kontinua dezenvolve Timor-Leste.

PR Lú Olo mós apela ba Liquiça-oan sira tenke dezenvolve munisípiu ne’e sai fatin sentru istóriku no turizmu iha futuru.

“Ita hala’o ona aktu formál hasa’e bandeira RDTL akompaña ho ita-nia Inu Nasionál nu’udár símbolu rua ba soberania, independénsia, unidade no integridade Timor-Leste nian. Ho serimónia ida ne’e ita-nia neon hala’i kedas ba ita-nia luta libertasaun nasionál naruk no nakonu ho susar oioin. Ohin ita afirma nafatin ita-nia identidade nasionál ne’ebé identifika ita nu’udár povu úniku ho kbi’it rasik no hakarak rasik, harí nasaun-hanaran kedas Timor-Leste, bainhira ita hahú movimentu libertasaun nasionál iha 1974”, Xefe Estadu ne’e iha ninia diskursu ba komemorasaun loron proklamasaun independénsia ba da-45 iha munisípiu Liquiça, Sábadu (28/11/2020).

Lú Olo hatutan, rai Liquiça bele dezenvolve nu’udár sentru produsaun hahán husi rai-maran no husi tasi ba kapitál Díli ho populasaun boot tebes no sei sa’e ba bei-beik, Loes besik fronteira no bele sai sentru merkadu boot ida ho interkámbiu ho rai Indonézia no ho munisípiu Bobonaro no Ermera, esplorasaun rai-henek ba konstrusaun aas tebes iha Liquiça, maibé Estadu presiza haree no regula oinsá fahe atividade ida ne’e ba emprezáriu lokál sira, atu família barak liu bele hetan benefísiu mós husi rekursu naturál ne’e.

“Liquiça-oan fó-an ba mate ba rai ida ne’e no balun ita halo’ot ona iha Jardim dos Heróis da Pátria. Ita presiza haree oinsá hatutan sira-nia ezemplu patriotizmu husi jerasaun ba jerasaun atu Liquiça-oan bele kaer metin valor no prinsípiu ne’ebé garante ita moris nafatin nu’udár povu no nasaun. Ha’u apela ba Timor-oan hotu-hotu atu hamutuk ita lori Timor-Leste ba oin, nu’udár Estadu soberanu, independente no lori ita-nia povu ba moris di’ak”, tenik PR ne’e. oly