Evita inséndiu, SEA husu empreza sira halo jestaun ba armazén

Sekretáriu Estadu Ambiente (SEA), Demétrio Amaral de Carvalho, alerta ba empreza sira atu halo jestaun ba armazén, atu nune’e labele fó impaktu ba ambiente.

“Ita iha tempu balun ba kotuk ahi han armazén iha mina ninian iha Elemloi dala rua ona. Ita hatene katak risku primeiru loos duni ba emprezáriu ne’e lakon nia asset, osan, ekipamentu no materiál sira ne’ebé nia tau iha armazén. Maibé bele mós fo prejuízu ba públiku ka Estadu. Tanba ne’e ita alerta ba empreza sira ne’ebé iha armazén iha Díli laran no mós iha fatin sira iha teritóriu Timor-Leste tenke hatene mekanizmu atu halo jestaun ba sira-nia armazén”, SEA hato’o lia hirak ne’e hafoin abertura  semináriu kona-bá jestaun ba ambiente, liu-liu armazén ba empreza no pesoál produtór Tahu no Tempe iha Timor-Leste, Segunda (30-11-2020).

Demétrio hateten, empreza tenke halo jestaun ne’ebé di’ak ba armazén sira tuir nesesidade ba kontrolu no seguransa iha armazén laran.

Tanba armazén ne’ebé tuir padraun Best Pratice ne’e tenke hatene ekipamentu saída mak tenke rai iha-laran. Atu nune’e bele evita risku sira hanesan inséndiu, nune’e empreza sira tenke hatama iha sira-nia planu jestaun padraun hirak ne’e atu evita prejuízu ba sira, Estadu no ambiente.

Governante ne’e haktuir dau-daun ne’e SEA rejistu krime ambientál sira hanesan komersializasaun ba  manu-fuik sira ne’ebé Estadu bandu ona. oct