PN: Presu sesta bázika la tuir promesa husi Governu

Bankada CNRT iha uma fukun Parlamentu Nasionál (PN) preokupa ho Governu nia implementasaun programa sesta bázika ba komunidade sira, tanba presu sesta bázika ne’e la tuir promesa husi Governu ne’ebé dehan kada ema ida sei hetan USD 25, maibé realidade iha terenu presu pakote sesta bázika ne’e la to’o USD 25.

“Ha’u espera tenke iha balansu ho Provedoria dos Direitos Humanos e Justiça (PDHJ) ema sira ne’e dehan buat sira ne’ebé iha sira-nia direitu la to’o USD 25 ba fulan rua sai USD 50, sira konta la to’o, tanba ne’e mak sira la simu. Tanba ne’e deputadu CNRT mós husu ba Comissão Anti Corrupção (CAC) atu akompañia, sé sira-nia direitu la to’o osan ne’ebé sira konta, to’o la to’o ne’e tanba razaun saída. Ha’u soe hela ba instituisaun sira atu bele tau matan halo buat ne’ebé loos, labele ho hanoin ema boikota, ema bele boikota, maibé investiga lai, ita labele akuza ema hotu iha Timor lakohi simu tanba ema boikota”, Xefe bankada CNRT, Duarte Nunes liu husi ninia intervensaun iha plenária, Tersa (15-12-2020).

Deputadu bankada FRETILIN, Alexandrino Cardoso, rekoñese, Governu anunsia iha Parlamentu Nasionál (PN) hodi aprova orsamentu kada ema sei simu montante USD 25, maibé la’ós simu osan, Governu uza osan refere, hodi troka ho nesesidade bázika ba populasaun sira.

“Kestaun kona-bá ai-han ne’ebé fuk ida mós loos, maibé la’ós hotu-hotu, tanba ne’e ha’u hanoin Governu iha dever atu halo investigasaun, halo monitorizasaun ba kompañia lokál sira ne’ebé manan tenderizasaun hodi fahe sesta bázika. Ita labele fó kulpa Governu, tanba Governu la sosa no la distribui direta ba komunidade sira”, dehan Alexandrino.

Hatán ba kestaun ne’e, Sekretáriu Estadu Komunikasaun Sosiál, Mericio Juvinal Akara, klarifika, dau-daun ne’e Governu atribui hela pakote sesta bázika ba komunidade sira, maibé relasiona ho preokupasaun husi deputadu sira ne’e Governu prontu atu hadi’a.

“Kona-bá programa sesta bázika ne’ebé ita-nia deputadu sira preokupa Governu iha nivél implementasaun servisu maka’as atu hadi’a difikuldade barak mak enfrenta iha terenu, kestaun implementasaun no operasionál ne’ebé mak ita-nia ministériu relevante sei hadi’a polítika laiha problema, tanba Governu iha responsabilidade”, tenik Akara.

Entretantu programa sesta bázika ne’e Governu lansa ona iha munisípiu Díli, Bobonaro, Covalima no Viqueque. ety