Fretilin fiskaliza Sesta Bázika hodi taka falta

Deputada bankada CNRT, Maria Barreto Gorumali, hateten, fiskalizasaun surpreza ne’ebé bankada FRETILIN mesa-mesak halo iha suku Villa Verde ne’e hanesan maneira ida atu apoia malu hodi taka fallansu no la’ós atu identifika fallansu ka problema ne’ebé mak iha.

“Distribuisaun Sesta Bázika iha Díli iha área Villa Verde nian katak, komunidade sira ne’ebé ba hetan ka simu Sesta Bázika sira-nia materiais ne’ebé sira simu la bazeia ba montante orsamentu ne’ebé mak iha. Sira mós levanta kona-bá deputadu hosi PN ba halo fiskalizasaun, maibé sira ne’ebé ba ne’e mesak bankada FRETILIN, bankada sira seluk laiha, entaun sira hanoin katak atu apoia malu, hanesan mós iha munisípiu katak, sasán ne’ebé benefisiáriu sira simu la hanesan ho resivu, nune’e husu labele halo diskriminasaun ba iha komunidade”, afirma deputada opozisaun ne’e iha plenária PN, Tersa (20/01/2021).

Maske nune’e, Deputadu bankada FRETILIN, Antoninho Bianco, hateten, fiskalizasaun surpreza bankada FRETILIN ne’e hanesan dever ida, hodi haree direta prosesu ne’ebé la’o iha baze.

“Ami bankada FRETILIN iha dever hanesan reprezentante povu, dever atu tun ba baze hodi tau matan, tanba ne’e mak ami dehan vijilánsia surpreza, ne’e katak ita fiskalizasaun surpreza, ami tun ba kraik hodi haree direitamente. Ne’e la presiza hetan autorizasaun hosi Prezidente PN, tanba Prezidente PN só autoriza ba komisaun ida-idak nia servisu, maibé bankada ne’e reprezentante povu, organiza an hodi tun ba baze, tanba ne’e mak mai ba fatin-fatin, maibé iha Díli ami la’o hamutuk para atu haree serteza”, afirma deputadu Bianco.

Fiskalizasaun surpreza ba distribuisaun Sesta Bázika ne’e deputadu bankada FRETILIN hala’o iha loron 15, fulan Janeiru, tinan 2021, iha Suku Villa Verde, Postu Administrativu Vera-Cruz, Munisípiu Díli. say