OJE 2021 laiha, Governu husu públiku lalika fiar

Primeiru Ministru (PM), Taur Matan Ruak, klarifika katak, públiku labele fiar rumoris kona-bá Orsamentu Jerál Estadu (OJE) tinan 2021 laiha no mós  Banku Federál Amérika sei la transfere osan mai Timor-Leste, hodi hala’o dezenvolvimentu nasionál.

PM Taur, husu atu povu sira fiar de’it informasaun ofisiál husi Governu mak bele fó sai kona-bá asuntu orsamentu nian.

“Iha semana kotuk ha’u hatete ona ba ita katak, lalika ba rona informasaun sira ne’ebé la’ós ofisial. Ita dau-daun ne’e sei iha hela osan USD 300 e tall milhões, tanba ne’e levantamentu ita seidauk halo, maibé kuandu presiza Ministériu Finansa (MF) sei koordena ho Banku Sentrál bele halo levantamentu ho osan para finansia ita-nia OJE ba 2021, tanba ne’e lalika fiar katak osan laiha, sei la mai, Amerika la fó, ne’e laloos”, PM ne’e ba jornalista sira iha Palásiu Prezidensiál Nicolau Lobato, Bairro Píte, Díli, Kinta (14/01/2021).

Xefe Governu subliña, kuandu halo dezenvolvimentu primeiru tenke hatene atu halo saída, segundu tau osan, terseiru mak implementa, ne’ebé orsamentu 2021 nian ne’e halo atividade 2021 nian.

“Kuandu komesa halo hotu-hotu hatene, konserteza kada ministéiru ida hatene, públiku sira hatene tinan ne’e halo saída? entaun implementa mak ida ne’e, dalaruma hanoin hakarak halo ida ne’e halo kedan, mezmu orsamentu laiha. Orsamentu kuandu laiha ita labele halo, só halo buat ne’ebé planeadu no orsamentu ne’e tau ba buat ne’ebé planeadu no orsamentu 2021 ne’e mak iha Janeiru, komesa diskute ho nia tékniku sira ba nia implementasaun, tanba ne’e mak osan ba 2021 ne’e iha”, tenik Taur. oly