PLP preokupa tempu udan komunidade Covalima sempre afeta inundasaun

Reprezentante povu iha uma fukun Parlamentu Nasionál (PN), liu-liu bankada PLP preokupa kuandu tempu udan abitante Covalima sempre enfrenta inundasaun, maibé Governu seidauk rezolve.

Tuir Abel Pires, inundasaun ne’ebé akontese iha munisípiu Covalima iha suku Debos no Beco impaktu husi auto estrada, tanba taka bee-dalan ba mota, nune’e hodi fó impaktu ba komunidade sira movimenta ba mai.

“Ha’u lamenta kona-bá inundasaun iha parte Beco ho suku Debos, tanba tinan ba tinan dezde konstrusaun auto estrada inundasaun sempre akontese iha munisípiu Covalima. Tanba impaktu husi konstrusaun auto estrada hodi  taka bee-dalan no bee la halai ona ba mota, tuir loloos fásil harii de’it bee-dalan boot uitoan auto estrada ninin ne’e rezolve ona. To’o agora la importante sé ita-nia povu sofre tinan-tinan la naton sai razaun ita atu halo buat sira ne’e, ita ukun atu servi sé, sé la servi ba ita-nia povu”, deputadu bankada PLP ne’e liu husi ninia intervensaun iha plenária, Segunda (11-01-2021).

Ministru Asuntu Parlamentar no Komunikasaun Sosiál (MAPKOMS), Francisco Jeronimo, klarifika, nia parte sei rejista no sei hato’o ba ministériu kompotente, hodi buka solusaun ba preokupasaun husi deputadu sira.

Antes ne’e, Prezidente Institutu Jestaun Ekipamentu (IJE), Ermenegilda da Costa, hateten, IJE preparadu atu salva komunidade iha kapitál Díli no munisípiu sira seluk husi inundasaun.

Nune’e mós IJE koloka ona ekipamentu pezadu iha fatin risku sira iha kapitál Díli no munisípiu sira hanesan Covalima, Manatuto, Bobonaro,  Baucau no postu administrativu Atauro-Díli. ety