Banku Federal Amérika parseiru konfiansa TL

Federal Reserve Bank of New York, nu’udar parseiru konfiansa ba Timor-Leste, nune’e, Governu Timor-Leste (TL) hakarak halo levantamentu ba konta Fundu Petrolíferu, Ministru Finansas haruka instrusaun transferénsia ida ba BCTL, hodi asesu fundu nee.

Komunikadu Imprensa nebe GMN simu husi Banku Central Timor – Leste (BCTL),  Governadór Banco Central de Timor-Leste, Abrão de Vasconcelos, klarifika, konta ne’ebé iha Banku Federal Amerika nu’udar fundu Estadu Timor-Leste nian no rejistu hodi BCTL nia naran ne’ebé jere relasaun entre BCTL no Banku Federal Amerika.

Governadór BCTL nee esplika, Lei prevé ona katak, Governu iha de’it konta ida iha BCTL, nune’e bainhira de’it Governu Timor-Leste hakarak halo levantamentu husi konta Fundu Petrolíferu, no Ministru Finansas haruka instrusaun transferénsia ida mai BCTL, hafoin prosesu polítika hotu no publika ona iha Jornal da República, konpetensia BCTL nian atu prosesa.

Abrão de Vasconcelos dehena tan BCTL nunka he­tan impedimentu atu asesu ba konta Fundu Petrolíferu iha Banku Federal Reserve New York, no laiha indikasaun ruma husi Federal Reserve Bank of New York, atu hakarak foti medidas ba asaun refere.

Governadór hatete katak ,situasaun ne’e kontráriu tebes, Federal Reserve Bank of New York kontinua sai nafatin parseiru valiozu no kon­fiante ne’ebé fó-ona sira-nia apoiu mássimu mai BCTL iha jestaun Fundu Petrolíferu dezde inisiu kedas iha tinan 2005.

Nia esplika hosi tinan 2001 Timor-Leste iha ona relasaun ne’ebé di’ak tebes ho Banku Federal, ne’ebé fasilita ona prosesu pagamentu hotu ne’ebé simu hosi BCTL relasiona ho Fundu Petrolíferu no  operasaun bankária sira seluk tan.

Nia apela ba públiku no media sira, atu hapara rumoris  ne’ebé mak espalla ona, no iha futuru mai husu ba públiku no média tenki verifika faktu sira iha BCTL ka Ministériu Finansas molok repete rumoris ne’ebé la-hó justifikasaun kona-ba jestaun Fundu Petrolíferu.*/Tos