JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

CNRT-ACBN konsidera Xanana nia asaun atu koriji erru ukun na’in sira

CNRT-ACBN konsidera Xanana nia asaun atu koriji erru ukun na’in sira

Partidu Congresso Nacional da Reconstrução de Timor-Leste (CNRT), ho Asosiasaun Kombatente Brigada Negra (ACBN-sigla portugés) apoia asaun korajozu no umanizmu líder nasionál  Kay Rala Xanana Gusmão, nian ne’ebé ho intensaun atu defende direitu povu ninian hodi kurize iregularidade ukun na’in sira ne’ebé mosu iha prosesu tratamentu ba ema ne’ebé konsideradu moras COVID-19 hodi hatúr fila-fali regra hodi respeita prosedimentu ne’ebé  Organizasaun Mundial Saúde (OMS) hatúr ona iha prosesu fúnebre, katak dignifika no respeita ema nian kultura,  uzu  kostume, valór relijiozu no prátika ka tradisaun moris nian.

“Partidu CNRT hakarak responde mos ba atakes no dezmente akuzasaun sira hotu ne’ebé dirije ba Maun Boot Kay Rala Xanana no fó apoiu tomak ba Maun Boot tanba razaun sira hanesan tuir mai ne’e: Maun Boot Kay Rala Xanana maka figura prinsipal no primeiru ne’ebé la’o hale’u Timor-Leste hodi hala’o kampaña no promove medidas prevensaun COVID-19 ba populasaun sira, liu-liu iha área fronteirices. Maun Boot Kay Rala Xanana respeitu no valoriza funsionáriu, ekipa saúde no ema hotu-hotu ne’ebé halo esforsu tomak hodi luta hasoru COVID-19. Maun Boot Kay Rala Xanana figura prinsipal ne’ebé halo pedidu ba Governu nasaun amigu sira hodi husu apoiu ekipamentu protesaun ba profisionál saúde ho ekipa liña frente ba kombate COVID-19 sira. Maun Boot Kay Rala Xanana respeitu protokolu Covid-19 nian dezde inísiu, inklui kumpre regra auto-kuarentena to’o loron 14 bainhira fila husi rai-liur (Indonézia). Maun Boot Kay Rala Xanana maka figura prinsipal ne’ebé foti  inisiativa harii fasilidade kuarantena ho izolamentu ba  Covid-19 nian iha Tasi Tolu. Ne’ebé oras ne’e uza hodi halo tratamentu pasiente COVID-19”, Deklara Vise Prezidente CNRT, Virgílio Smith, ba Jornalista sira liu husi konferénsia  ba inprensa iha Bairo dos Grilhos,  Díli, Kuarta (14/04/2021).

Líder Partidu CNRT ne’e haktuir, iha iregularidade barak maka Governu rasik halo iha prosesu tratamentu pasiente COVID-19, hodi nune’e  Maun boot Kay Rala Xanana Gusmão foti asaun, iha loron 12/04/2021.

“Irregularidade sira ne’e maka hanesan tuir mai ne’e: Governu deklara Estadu Emerjénsia maibé lafoti medidas ho rigór iha parte sanitária nian no mos  sériu proteja sidadaun sira hosi ameasa COVID-19 konkretu maka hanesan la-aplika dezinfetante ba ema no sasán ne’ebé tama no sai husi kapitál Díli no medidas seluk durante implementasaun Estadu Emerjénsia. Ikus mai Covid-19 ba mosu tiha iha Suai, haksoit ba Baucau ikus liu fila mai da’et barak liu iha Díli.  Governu halibur hamutuk pasiente pozitivu Covid-19 nian ih fatin kuarantena ho izolamentu maibé la aplika medidas rigorozas hodi proteze pasiente sira nia saúde, hanesan la prepara ai-moruk nebe adekuadu, la mantein distansia sosiál maibé iha kuarantena sira ne’e rame hela deit hanesan iha merkadu. Pasiente barak maka hela iha Kuarantena ho izolamentu liu tiha loron 14 tuir protokolu COVID-19 nebe OMS hasai, maibé Governu la husik sira sai husi karantena ho izolamentu no la halo esplikasaun hodi fo razaun diak.  Governu halo tratamentu éspesial, ate halo lei éspesial atu akomoda lider partidu balun nia ezijénsia, ne’ebé deklara la- fiar COVID-19 no lakohi atu ba hela iha izolamentu, tanba ne’e Governu halo lei hodi hasai pasiente ne no muda fatin izolamentu ba iha uma privadu. Maun Boot Kay Rala Xanana triste tanba Governu halo presedimentu fúnebre (hakoi ka enterru) sidadaun ne’ebé mate ho COVID-19 la ho dignu no la tuir kultura Timor nian, no la tuir prosedimentu ne’ebé OMS hasai ona” Portavos ne’e hatutan

Lee hotu :   PR Lú Olo la imparsiál, ACBN apoia petisaun CNRT ba TR

Vise prezidente CNRT ne’e haktuir, iregularidade sira ne’e maka obriga Maun Boot Kay Rala Xanana halo asaun iha loron 12/04/2021, hafoin rona tiha halerik hosi matebian Armindo Borges (47) nia fen-kaben ho oan sira iha dadersan madrugada iha Xanana Gusmão nia rezidénsia .

“Asaun Maun boot Xanana ne’e halo ho objetivu atu korrize prosesu tratamentu ba Covid-19 ne’ebé inkonsistente no diskriminativu, liu-liu processo fúnebre ne’ebé la digno tuir kultura, valores religiosos no tradisaun Timor-oan nian. Maun Boot Xanana deklara ba Adjuntu Komandante SIJK (Sentro Integradu Jestaun Krize) katak prontu atu apoia se -se de’it, inklui Estadu luta hasoru Covid-19 bainhira entrega mate-isin ba família no halo enterro ho digno, tuir Kultura, uzu Kostume, prinsípiu , relijiozu  no tradisaun, haktuir parámetru nebe Organizasaun Mundial Saude (OMS) mos hatu’ur tiha ona”,tenik Virgílio.

Partidu CNRT hosi nasionál to’o baze apoia inkondisionalmente ba sira-nia líder máximu ne’e nia aktu umanizmu ho korajozu hodi protesta no korize hahalok sira ne’ebé prejudika no haterus povu.  Partidu  CNRT apela ba Governu atu koopera ho asaun líder karismátiku ne’e, hodi hetan solusaun ba problema ida ne’e no hatúr dignidade umanu Timor-oan tuir nia kultura.

Iha fatin hanesan  Membru Komisaun Polítika Nasionál Partidu CNRT, Dionísio Babo, deklara, asaun ne’ebé líder karismátiku Kay Rala Xanana Gusmão ne’e halo, laiha intensaun polítika.

“Forma de Protesto ne’ebé maka Kay Rala Xanana Gusmão halo ne’e, hodi husu ba Governu atu bele koopera  no halo prosedimentu ne’ebé di’ak tuir standar OMS nian liu-liu atu halo tratamentu ba pasiente sira ne’ebé maka mate ona ho prosesu ne’ebé maka la’o tiha ona, liu-liu kona ba fúnebre hodi bele tuir kultura tradisaun valores , relijiozos Timor nian. Tanba to’o agora Timor-Leste seidauk iha protokolu ida kona ba fúnebre ou hakoi mate sira iha Covid ne’e ne’ebé estabelesidu. Tanba ne’e maka apela para ita tuir prosediemntu sira ne’e hotu. Segundu maun Xanana nia aktu ne’e hatudu humanismu aktu ida ne’ebé hodi defende direitu ema ne’ebé maka afetadu, ne’ebé durante nie’e nia haré I laiha intensaun polítika  nem politika uit-oan, tanba ne’e maka partidu la mosu iha ne’ebá la partisipa iha ne’ebá  I lamarka mós nia prezensa iha nia prosesu CNRT hanesan organizasaun polítika iha devér atu apoia aktu ida ne’ebé de’it inklui aktu ida ne’ebé mai husi nia líder rasik hodi bele defende povu Timor-Leste nia interese”,Dionísio esklarese.

ACBN: Asaun Xanana nian la’ós atu kontra Governu

Asosiasaun Kombatente Brigada Negra (ACBN-sigla Portugés) apoia asaun líder nasionál Kay Rala Xanana Gusmão,  tanba konsidera atu koriji erru ukun nain sira nian, la’ós atu kontra Governu.

“ Asaun ne’ebé Líder nasionál halo dadaun ne’e,  la’os kontra Governu, tanba hakarak dezakredita ema sira ne’ebé maka kaer ukun, no asaun ne’e laos hakarak hatudu katak, la fiar covid-19 nudar pandemia existe iha mundu tomak, inklui mos posibilidade atu afeta ka propaga ka kontamina povu TL,” Sekretáriu Jerál ACBN,  Rui Lourenço da Costa hato’o deklarasaun ne’e liu husi konferénsia ba imprensa iha nia knaar fatin Balide Tersa (13-04-2021).

Lee hotu :   Ladauk halo pagamentu ba reklamante, CNRT: Povu nia tusan sei iha Governu

Iha asaun líder nasionál ne’e, halibur ema barak,  ne’ebé mai ho spanduk ne’ebé hakerek,  Timor Leste Free COVID 19,  maibé Rui Lourenço defende nafatin katak,  asaun ne’ebé tama ona ba loron tolu ne’e,  la’os hakarak atu hatudu,  la fiar Covid-19, eziste iha TL. Tanba covid-19 nu’udar pandemia global, no posibilidade afeta mós mai iha nasaun ida ne’e.

“ACBN lori nia militantes tomak nia naran sauda no apoia Maun Boot Xanana Gusmão tanba asaun pasifika ne’e iha objetivu fundamental atu hatudu ba ukun nain sira katak, iha medidas balun ne’ebe maka Orgauns kompetentes ba tratamentu kestaun covid-19 hahu hamosu ema lakon fiar –konfiansa tanba medidas ne’ebe foti diskriminativu tebes no fo mensajen momos hela ba povu katak, covid-19 ne’e nudar programa governu no haluhan prioridade programa dezenvolvimentu hodi hatan ba situasaun actual povu nian ne’ebe morisn kiak no halerik hela, “ Rui esplika.

Tuir Rui katak, ACBN apoiu asaun ne’ebe Líder Nasional halo, tanba konsidera ne’e asaun ida atu kuriji buat ne’ebe sala, no asaun ne’ebe iha vontade atu enkoraja ukun nain sira atu foti medidas de tratamentu ba vitima covid-19, tuir lisan, kultura, ka tadisaun TL nian iha ambitu halot ka tratamentu ba matebian sira.

“ Asaun ne’e karik ita hare didiak ba rekomensaun husi Organizasaun Mundial  Saúde(OMS) nian hanesan hateten katak, iha tratamentu ba ema ne’ebe mate tanba covid-19, Estadu iha ubrigasaun atu konsidera dignidade ema mate ne’e nia kultura, nia relizaun, nia tradisaun, no respeita nia família nia hakarak, li-liu autoridade sira tenki trata ema ne’ebe mate, tanba covid-19, ho medidas ne’ebe maka dignu.

Haree ba ida ne’e, ACBN fiar katak, asaun Líder Nasiona Kay Rala Xanana nian atu bele tulun ukun nain sira bele adapta medidas e kodusivus ho povu Maubere nia kultura, relijiaun no tradisaun.

Asaun líder nasionál ne’e mosu, tanba polémika ne’ebé mosu entre família matebian Armindo Borges nian,  ho rezultadu diagnostika saúde nian.  Iha ne’ebé família matebian deklara,  Armindo mate tanba moras komplikadu,  maibé teste restreu hosi laboratóriu hatudu rezultadu katak,  Armindo nia mate tanba mós COVID-19.

Mate-isin Armindo nian to’o oras ne’e, sei rai hela  konjeladór iha sala Izolamentu Vera Cruz tanba hosi parte família ho Ministériu saúde seidauk hetan solusaun ba prosesu hakoi nian.

Avelino Coelho: Governu presiza halo akordu ho Xanana

Eis Kolaboradór Xefe Estadu Maior das Falintil, Avelino Coelho, husu Governu atu halo akordu proposta solusaun ho Líder Nasionál, Kay Rala Xanana Gusmão, hodi buka solusaun ba problema mate-isin Armindo Borges.

“Ministra Saúde nia prezensa iha Vera-Cruz reprezenta Governu, tanba ne’e espera bele iha modelu solusaun ba problema ne’ebé iha, tanba iha situasaun ida agora iha Vera-Cruz hatudu hela katak, iha situasaun ne’ebé presiza solusaun”dehan Jurista Avelino Coelho ba JN-Diário Tersa (13/04/2021) iha Balide Díli.

Lee hotu :   PN sei halo votu konfirmasaun ba LPS ne’ebé PR veta

Avelino afirma, solusaun ba problema ne’ebé iha mak presiza proposta, ne’ebé hato’o hosi Governu ba Xanana nudar Líder masimu rezistensia tanba sei Xanana la lídera funu to’o Timor ukun-an ita ohin loron ne’e oinsa nusa, tanba ne’e apesar diferensa ídea  bele hamosu hanoin balun atu rezolve problema ne’ebé iha.

“Problema ne’e mosu konaba presepasaun realidade mak oin seluk, tanba ne’e ho asaun Xanana nia kontribui atu hetan solusaun ida apesar Covid ameasa bo’ot iha ita nia Nasaun, maibé tratamentu ba pasiente no mate isin covid tenke tuir medidas ne’ebé OMS prevê, entaun ho proposta solusaun bele rezolve ona problema mate isin Armindo nian”.

Nia dehan, asaun Xanan nian la kontra Governu no la hatún ema ida, maibé asaun ne’e hanesan lalenok ida atu leno keta buat balun halo ladun los karik no atu la dehan sala maibé oinsa atu kurize tanba bainhira kurize desizaun no asaun balun mak halo ema fiar liu tan.

“Asaun Líder Xanana nian nia fokus sentral, oinsa mak povu bele fiar hikas ita hotu, tanba ne’e asaun ne’e diak no la’ós kontra Governu, maibé asaun ne’e hanesan kontributu sidadaun kuantu mais Líder Nasionál ida iha responsabilidade, tanba ne’e mak presiza iha diálogu tanba se ita preziste iha pozisaun la rezolve problema no ajudika liu tan”,afirma Eis Koloboradór Xefe Estadu Maior das Falintil.

Prezidente PST ne’e, hatutan loke diálogu hodi koalia ba malu hanoin bele rezolve problema, la presiza temi diálogu ho se, maibé tuir loloos Ministra Saúde ba ne’e atu halo diálogu maibé la mosu diálogu fali. Agora la presiza se mak atu ba koalia, maibé importante ida ne’ebé atu ba koalia ho Xanana alende Líder Nasionál nia mós reprezenta hela família matebian nia problema no sofrementu.

“Xanana ema ida ne’ebé loke ba diálogu, se iha rezisténsia nia loke diálogu, tanba sa mak agora entre ita la buka diálogo hodi rezolve problema ki’ik ne’e. Tenke rezolve problema ho dignidade, kultura no lisan no bele hamosu modelu foun atu oinsa tratamentu ba pasiente Covid-19 tuir medidas OMS nia”.dehan.

Tanba ne’e espera katak, Governu sei la hola pozisaun ida toos demais, maibé sei flexibilidade atu koalia ho Xanana, nune’e bele iha solusaun tanba asaun pasífíka ne’ebé Xanana halo la’ós dehan sala, maibé hatete dehan, karik dalan ne’e sala oituan tanba povu komesa laiha fiar entaun atu konstrue fila-fali fiar iha sosiedade mak bazeia ba koreksaun aktus medidas no polítika sira ne’ebé karik ladun adekuadu.

“Aktu Xanana nian aktu edukativu, kualker líder no se deit mak hakarak hamrik hanesan líder defende kauza ida nia tenke aseita sakrifísiu hanesan la han no toba iha rai ne’e ideal, ba ha’u ida ne’e prosesu edukasaun polítika, sívika ba sidadaun tomak, tanba asaun ne’ebé Xanana halo nia fiar kazu ne’e los”,tenik. Luc/eni/Fel

Add to Comments Here!!!!

error: Content is protected.
Secured By miniOrange
You might also like:
Governu la rezolve problema mate-isin AB, veteranu sira ameasa sei mosu buat seluk

Veteranu sira ameasa atu halo asaun,...

Pasiente COVID-19 na’in ualu iha Vera Cruz, ida kondisaun grave

Koordenadór Forsa-Tarefa ba Prevensaun no Mitigasaun...

Komité 12 Novembru lamenta ho deklarasaun deputadu ‘Somotxo’ atu seguransa tiru manifestante

Membru Komité 12 Novermbru, lamenta tebes...

Close