Timor GAP prontu halo esplorasaun ba GS

Timor Gas And Petroleum (GAP) iha kapaside atu servisu hamutuk ho  kompañia  joint venture  sira  hanesan Woodside ho Osaka Gas atu halo esplorasaun ba mina no gas Greater Sunrise (GS) iha tasi okos tuir sistema ne’ebé iha.

Prezidente Timor GAP, Francisco Monteiro hato’o asuntu ne’e ba GMN, hodi  responde  preokupasaun deputada Josefa Pereira husi bankada FRETILIN  ne’ebé hatete katak, Timor GAP laiha kapasidade atu jere orsamentu, no laiha jestaun ne’ebé di’ak.

“Deklarasaun deputadu ne’e bei-beik ona, dalaruma ami ba komisaun ko’alia buat hotu di’ak de’it, maibé ba ona ko’alia iha públiku liu husi média sira ne’e, hatudu katak, ko’alia aat ona kompañia Timor GAP ida ne’e. Nu’udar Prezidente kompañia senti triste tebes, tanba politiza sasan sira ne’e, halo públiku, komfuzaun fali.  Ne’eduni informasaun ne’ebé deputadu sira hato’o ne’e lalos, ida tanba kompañia Timor GAP iha kapasidade ona atu halo esplorasaun mina iha tasi okos, hamutuk ho kompañia internsaional sira”,  hateten Francisco Monteiro  ba GMN iha nia knar fatin Timor Plaza Díli, Tersa (26/02).

Tuir Francisco, dadaun ne’e ekipa Timor GAP mós halo  ona estudu viabilidade, tuir sistema ne’ebé mak iha ona.

Francisco esklarese, rekursu umanu Timor GAP mós  sufisiente no  prontu atu servisu hamutuk ho kompañia internasionál sira hodi esplora mina iha tasi okos, ho kompañia joint venture sira.

“Hein faze atu implementa projetu, hodi halo esplorasaun mina iha tasi okos, presiza tuir sistema ne’ebé iha tiha ona. Tanba ne’e  labele haree liu ba fíziku ninian, maibé importante mak estudu no tuir sistema viabilidade, para oinsa prosesu hirak ne’e iha ninia rezultadu di’ak”,katak  Francisco.aba