Vise MAE: Filomena sai Administradora Manufahi desizaun KM

Vise Ministru Administrasaun Estatal (MAE) Abilio Caetano, hatete, Konselhu Ministru (KM) aprova rezolusaun governu nomeasaun Administradora foun, Filomena da Costa Nunes, sai Administradora Munisípiu Manufahi, troka eis Administradór matebian, Carlito Cardoso.

“Filomena sai Administradora liu hosi prosesu naruk no hetan klasifikasaun diak bainhira tuir teste kandidatu, ne’ebé kompete iha rekrutamentu espesiál Administradór Manufahi, tanba ne’e la’os MAE mak hili”,Vise Ministru MAE, Abilio Caetano, klarifika asuntu ne’e ba JN-Diário, Segunda (24/02/2020) iha Kolmera Díli.

Vise Ministru Estatal hateten, desizaun governu nomea Filomena da Costa Nunes, liu hosi prosesu ne’ebé ekipa komisaun espesiál hala’o ba kandidatu nain 18 no ikus nain 3 mak liu, maibé tanba Filomena da Costa, mak hetan klasifikasaun primeiru entaun KM aprova, Filomena da Costa, mak sai Administradora foun Manufahi nian.

“Ha’u nia kna’ar mak atu lori relatóriu ikus ba aprezenta iha KM, no agora KM aprova ona rezolusaun nomeasaun Administradora Manufahi nian, no agora hein deit despaisu asinatura hosi Primeiru Ministru, Taur Matan Ruak, hodi prepara atu fó posse ba Administradora Manufahi”,esplika nia.

Abilio Caetano haktuir, nia parte la hatene razaun saida mak veteranu no entidade sira hosi Manufahi, la aseita nomeasaun ba administradora foun refere no husu atu  mantein ho Adjuntu Administradór Arantes Isaac ba Adminstradór foun.

“Laiha regulamentu ida hatete katak, bainhira Administrdór ida mate no rezigna-an hosi nia kargu, mak MAE tenke foti Adjuntu sai fali Administradór ida ne’e laiha, tanba ne’e ha’u la hatene razaun veteranu no entidade sira aseita desizaun nomeasaun, Filomena da Costa, ba Administradora, tanba desizaun ne’e bazea ba prosesu tomak, ne’ebé ekipa halo ba kandidatu sira no Filomena tuir prosesu formal tomak”,tenik nia.

Antes ne’e, vetaranu hosi Munisípiu Manufahi, Vidal de Jesus ‘Riak Leman’ hatete, veteranu entidades no povu Manufahi, la konkorda ho desizaun hosi governu konaba nomeasaun Administradora foun no sira husu aru mantein Adjuntu Administradór ba Administradór Manufahi.

“Ha’u atu dehan deit katak, situasaun ida ne’e hanesan dezafiu ida ba Administradór foun ne’ebé atu ba troka Administradór sesante matebian, tanba iha prinsipiu ida katak, bainhira atu delega ema ruma ba  assume kargu hanesan Administradór Xefe Suku no Xefe Aldeia, tenke iha aseitasaun ema hotu, tenke iha kapasidade atu konduz atividade Munisípiu nian no la hare ba kor partidu, ida ne’e mak povu Manufahi hein”,haklean nia. Fel