Arsénio Bano rejeita “maltrata” hasoru komandu PNTL Oe-Cusse

Prezidente Autoridade Rejiaun Administrativa Espesiál Oe-Cusse Ambeno (RAEOA), Arsénio Paixão Bano, desmente, deklarasaun husi komandu Polísia Nasionál Timor-Leste (PNTL) Oe-Cusse ne’ebé hateten, pesoál balun husi autoridade RAEOA, hasa’i liafuan aat hasoru autoridade seguransa.

“Ha’u la hatene nusa mak komandante mós ba halo deklarasaun insatisfeitu, kuandu asidente ruma investiga, lalika halo deklarasaun polítika. Komunikasaun ha’u hanesan Prezidente autoridade ha’u labele ba tama tan to’o investigasaun kriminál ka saída? Sé komandante sira hanoin dehan buat ruma laloos, lalika halo deklarasaun akuza ema balun difama ema balun ne’e laloos ida. Difama labele temi iha termu polísia ninian, kuandu laiha investigasaun hatudu ema ida, loos ka laloos ne’e lalika ko’alia. Sé iha asidente ne’ebé solusaun polisiál, sira mak hato’o relatóriu mai autoridade”, Prezidente RAEOA ne’e hafoin partisipa iha inaugurasaun sede sukursál BNCTL iha Oe-Cusse, Sesta (20/22/2020).

Arsénio mós konsidera, deklarasaun ne’ebé antes ne’e komandu PNTL rejiaun Oe-Cusse hato’o ba públiku, ne’e nu’udár deklarasaun polítika.

Tanba ne’e, nia parte husu presiza loke investigasaun kle’an kona-bá kazu ne’e, hodi prosesa tuir dalan legál.

Antes ne’e, Adjuntu Komandante PNTL RAEOA, Superintendente Nicolao da Costa foin la-lais ne’e, kondena maka’as autoridade RAEOA ne’ebé lansa linguajen la edukativu hasoru autoridade PNTL no mós Uma Kreda iha RAEOA no promete sei prosesa kazu ne’e ba tribunál. san