Sidadaun Indonézia pozitivu COVID-19 rekuperadu

Koordenadora Jerál Corona Virus Disease 2019 (COVID-19), Odete da Silva Viegas, hatete, sidadaun Indonézia ne’ebé izola iha Vera Cruz, iha loron 26, fulan Outubru, tinan ne’e, nia kondisaun saúde rekuperadu ona, tanba rezultadu teste hatudu negativu, nune’e sidadaun refere fila hikas ona ba ninia hela fatin.

“Iha oportunidade ida ne’e hakarak mós fó sai ba públiku katak, ita-nia moras ida ne’ebé mak pozitivu tama iha kuarentena iha loron 16, fulan Outubru, tinan 2020, ohin ita sei fó alta i nia rezultadu dala rua durante nia baixa iha Vera Cruz hatudu negativu iha loron 11, fulan Novembru no loron 13, fulan Novembru, tinan 2020, portantu depois de konferénsia imprensa ne’e ita sei fó sai alta sidadaun mane ne’ebé ho idade 59, tanba  nia kondisaun di’ak”, Koordenadora Jerál COVID-19 hato’o informasaun ne’e liu husi konferénsia imprensa iha salaun Palaçio das Cinzas, Caicoli-Díli, Sábadu (14-11-2020).

Relasiona ho surtu COVID-19 to’o ohin loron sei sai nafatin preokupasaun mundiál no ameasa ba saúde públiku, Odete apela ba komunidade sira liu husi Komisaun Nasionál COVID-19 atu nafatin mantein kalma no sempre nafatin halo medida prevensaun, hanesan fase-liman uza máskara wainhira ba iha fatin públiku.

“Konsiénsia ba ema ida-idak nian atu mós hala’o saída mak Ministériu Saúde (MS) hato’o no mós Organizasaun Mundiál Saúde (OMS) hato’o hela, sé ita rasik la konsiente katak moras ne’e importante ba ita-nia-an, ida ne’e susar ba ita atu bele aplika medida preventiva sira ne’e”, akresenta Odete.

Koordenadora Jerál COVID-19 ne’e realsa katak, to’o ohin loron Timor-Leste hatudu ona susesu boot iha mundu, tanba bele kontein no prevene ema sira ne’ebé ho kazu pozitivu no to’o ohin loron laiha ema ne’ebé moras grave no lakon vida.

“Globalmente COVID-19 ne’e sei eziste, nune’e ita ida-idak tenke nafatin matan moris no neon-nain karik iha ema ruma mak tama ilegál liña fronteira ou bele ultrapasa tiha ona liña fronteira tama to’o iha sidade ou munisípiu, husu nafatin ba entidade relevante liu-liu autoridade lokal sira atu bele foti asaun la-lais no koordena ho imigrasaun no mós Unidade patrullamentu Fronteira (UPF) sira atu bele hatama sira ba iha fatin kuarentena”, tenik Koordenadora Jerál COVID-19 ne’e.

Nia kongratula mós ba ekipa iha liña frente, Governu, Estadu no mós populasaun injeral no parseiru sira ne’ebé durante ne’e kontribui prevene COVID-19.

Tuir dadus MS, iha loron 14, fulan Novembru, tinan ne’e, total númeru teste 12248, hein rezultadu 387, total kumulativu kazu 30, rekuperadu 29+4=33, kazu foun 0, rezultadu negativu 11831, total kuarentena 222 iha Díli 179, munisípiu 43, auto kuarentena 267, iha Díli 266, munisípiu 1, pasa kuarentena 14 dias 6017, Díli 4966 no munisípiu 1051. eni