MS deteta Timor-oan ida pozitivu COVID-19

Ministériu Saúde (MS) rejista tan Timor-oan na’in ida (1) konfirmadu pozitivu COVID-19, pasiente refere ho sexu mane, idade 27, iha sintoma hanesan isin-kolen no tolan kaben moras.

“Atualiza kazu pozitivu 27 Janeiro 2021, ohin 27 Janeiro 2021 MS rejista tan Timor-oan na’in ida (1) ne’ebé konfirmadu kazu COVID-19, pasiente mane ho idade 27 ne’e iha sintoma hanesan isin-kole no tolan kaben moras, iha 24 Janeiro pasiente ne’e informa ba médiku iha fatin kuarentena katak, iha sintoma, ho ida ne’e ekipa vijilánsia responde kedas hodi halo teste Swab ka foti amosta, rezultadu teste husi laboratóriu relata katak, sidadaun ne’e pozitivu COVID-19, ho nune’e ekipa jestaun kazu iha pilár hitu (7) evakua kedas pasiente refere ba iha izolamentu Vera Cruz”, Koordenadór Pilár VII COVID-19, Nilton do Carmo da Silva hato’o informasaun ne’e liu husi konferénsia ba imprensa iha salaun enkontru Palásiu das Cínzas, Caicoli Kuarta (27-01-2021).

Nilton hateten, sidadaun na’in nen (6) hela iha ótel Novo Horizonte ne’e mai husi Indonézia no tama iha Timor-Leste, liu husi pontu entrada Batugade iha loron 20, fulan Janeiru, tinan 2021.

“Ita-nia maluk ne’e nia mai husi Indonézia hamutuk ho pasiente pozitivu hirak ne’ebé dau-daun ne’e iha izolamentu Vera Cruz. Sira tama mai Timor-Leste liu husi pontu entrada Batugade iha loron Kuarta, loron 20, fulan Janeiru, semana kotuk no iha Díli nia hela iha kuarentena ótel Novo Horizonte”, informa”, Koordenadór Pilár VII COVID-19 ne’e.

Nia hatutan, pasiente COVID-19 iha izolamentu Vera Cruz injerál sira-nia kondisaun di’ak hotu, inklui ida ne’ebé ho idade 64.

Tuir dadus husi MS hahú husi loron 27, fulan Janeiru, tinan 2021 ne’e, totál kazu kumulativu 68, kazu foun 1 no atuál baixa 18. eni