PR PROMULGA DEKRETU LEI TAXA BA TRANSPORTE ESTRANJEIRO

Prezidente Repúblika (PR), Francisco Guterres `Lú Olo`, promulga ona dekretu lei taxa hodi regula transporte públiku husi estranjeiru sira ne´ebé mak tama sai.

Dekretu lei taxa ne’e mos bele regula transporte sira husi Indonesia, bainhira tama-sai fronteira Motain, Mota Masin no  fronteira Oeucusi bele  selu taxa ba Estadu Timor-Leste,  no sei taka  sticker hafoin transporte bele autoriza tama mai Díli hodi ba Munisípiu sira.

“Ita-nia  atual Prezidente  Repúblika promulga ona dekretu lei numeru 28/2017  iha dia  loron 2     Agostu, aprova  ona  rezimi kontrolu sirkulasaun viaturan  entrada  saida teritoriu nasional. Hanesan iha lei no regras  ona iha tempu badak ami sei  implementa,“esplika Diretor Diresaun Nasional Seguransa Rodoviaria (DNSR) Superintendente Asistente Ismail Babo, ba GMN Kuarta (20/06/18) iha Ministériu Seguransa Vila-Verde, Díli.

Nia hatutan,  ba implementasaun dekretu lei ne´e  iha parte  Polísa Tránzitu ho mós komponente Seguransa fronteira sira iha Motain, Mota Masin no  fronteira Oeucusi.

“Bainhira kareta atu tama mai, dokumentus kareta ka motorizadas nia sei rekolla husi Polísia Tránzitu,  depois parte Tránzitu Timor nian sei entrega fali billeti ida  no taka sticker ba kareta hodi  bele sirkula tama Timor-Leste. Bainhira  atu fila-fali ba  Atambua-Indonesia, hafoin membru Tránzitu entrega hikas sira-nia dokumentus ba kondutor, atu nune´e bele evita ema lori kareta faan  iha Timor,”dehan nia.

Nia dehan, tipu sticker ne´ebé mak sei taka ba kareta ho koor oin-oin, hanesan koor mean ba kareta ho motor ne´ebé mak halo sirkulasaun durante loron lima nia laran,  sticker kinur sirkulasaun ba loron haat, sticker azul loron tolu, sticker modok loron rua, no sticker abu-abu ba loron ida.

“Tarifa  ba  taxa  sirkulasaun  durante oras 24 ba motor sei selu osan dolar  ru,  ba loron  rua selu $ dolar tolu,  loron tolu selu $ dolar lima,  loron hat sei selu $ dolar hitu, no  loron lima nia selu $ dolar sanulu resin lima. Nune’e ba kareta boot sira durante 24 oras sei selu $ dolar Amerika lima, loron rua sei dolar hitu, loron tolu dolar sanulu,no loron hat sei selu dolar rua nulu resin hat,loron lima sei selu dolar  tolu nulu,”dehan nia.

Ismail Babo haktuir, husi  taxa  ne´ebé mak ema sei selu hodi halo manutensaun ba estrada  sira kuak, husi  diresaun fronteira Batugade mai Díli, tanba husi loron ba loron kareta bo´ot liu mak tula naha todan tula husi fronteira mai Díli. Ne´e mak Diresaun  Nasional Seguransa Rodoviaria kria  polítika atu fó kompetensia ba Polísia Tránzitu atu  implementa hodi kontrolu  transporte ne´ebé mak tama sai fronteira.avi/Eus