UE kontinua hametin kooperasaun ho TL

Uniaun Europeia (UE) promete kontinua hametin kooperasaun bo apoiu Timor-Leste  iha área dezenvolvimentu sosiál no ekonomia.

Sekretáriu Jeral Adjuntu ba asuntu polítiku no Servisu Europeu Asaun   Externa Embaixadór Jean Cristophe Belliard informa kestaun ne’e, ba jornalista sira, hafoin remata enkontru ho Presidente Repúblika Francisco Guterres Lú-Olo iha Palásiu Presidensiál Nicolau Lobato, Bairo Pite Kuarta (22/05/’19).

Iha sorumutu ho Xefe Estadu ne’e, Uniaun Europeia kontinua monstra sira nia prontidaun atu hametin liu tan kooperasaun ho Timor Leste, no koalia mós konaba iha saida mak Uniaun Europeia tenke apoiu mai Timor-Leste iha futuru.

Jean Cristophe aprofunda, TL ho UE iha relasaun ne’ebé importante tebes, ba kooperasaun ne’e.

“Iha loron hirak liu ba, ha’u halo enkontru ho Ministru Negosiu Estranjeiru no Ministru Agrikultura, hodi ko’alia konaba kooperasaun UE ho TL. Enkuantu sorumutu ho Prezidente Republika ohin ne’e mós, diskuti konaba kontinua apoiu Timor-Leste iha área dezevolvimentu sosiál no ekonomia ba iha futuru “, dehan embaixadór UE ne’e.

Tuir embaixadór ne’e katak, agrikultura, edukasaun no juventude nu’udar setór prinsipál ne’ebé presiza hetan atensaun liu tan.

“Tanba populasaun ho númeru joven ne’ebé barak, presiza edukasaun ho kualidade, liga mós ba empregu, ho nune’e mak Uniaun Europeia sei kontinua hametin liu tan, nia koperasaun iha área sira ne’e”, nia esplika.

Iha sorumutu ne’e, diplomata UE ne’e mós ko’alia ho Xefe Estadu, konaba adezaun TL ba AZEAN, tanba importante tebes ba nasaun ida ne’e, no rekezitu sira ne’ebé presiza prienxe molok sai membru organizasaun resjionál ne’e mak zona ekonomia ne’ebé prinsipal liu iha mundu.

Iha sorumutu ho Xefe Estadu ne’e Sekretariu Jeral Adjuntu ba asuntu polítiku no servisu Europeu Asaun Externa Embaixador Jean Cristophe Belliard no nia delegasaun, akompaiña mós husi embaixador UE iha TL  Alexandre Leitão. SON