KO 25 husu povu Aileu fó informasaun ba istória rezistensia

Vise Prezidente Komite Orientador 25, Jacinto Alves, husu ba povu iha Munisípiu Aileu atu partisipa hodi fó informasaun rezistensia nian, hodi nune’e komite bele hakerek ba livru istória Juventude Rezistensia no Estudantil ba Libertasaun Nasional.

“Ami mai iha ne’e iha vontade nafatin, hato’o buat ne’ebé sai hanesan misaun ami nian, ita liu husi dalan ne’ebé naruk,  ita proklama ita-nia indepensia iha loron 28 fulan Novembru tinan 1975, to’o ikus ita la konsege hala’o iha forsa ida rejiaun ninian,  husi repúblika Indonézia nian mai hakotu tiha ita-nia proklamasaun ida ne’e, hodi obriga ita simu funu ida ké ita rasik lakohi kontra ita-nia vontade no hakarak”, dehan Vise Prezidenti Komite ne’e iha nia intervensaun ba populasaun sira iha Munisípiu Aileu Tersa (14/08/2019).

Jacinto haktuir, istória ne’e mos sei konta kona ba tempu okupasaun ninian, kona ba oinsa  Indonézia tama iha Timor Leste, no istória ne’e mós sei konta ba to’o iha loron 30 de Agostu, bainhira  povu  lori pregu reafirma no determina vitória final.

“Ami nia prezensa iha Aileu, atu hato’o ba señor Administrador ho kuadrus Administrasaun Aileu nian, ba populasaun sira hotu katak, komite ida ne’e hamrik ona, komesa haree prosedimentus hotu ona, komite refere komesa hatun ona nia ema,  halo peskiza foti istória memória ema hotu ne’ebé partisipa iha luta”, afirma Jacinto.

Vise Prezidenti Komite Orientador 25 ne’e, husu ba povu iha Munisípiu Aileu atu fó testamunha hodi sira rai hamutuk informasaun sira ne’e, atu aban bainrua bele hakerek istória.

“Tanba ne’e duni ho haraik aan husu partisipasaun maluk sira nian tomak, bainhira ekipa to’o iha ne’e sei husu kona ba istória Aileu nian iha tempu funu nia laran, favor ida kontribui hela hodi fó informasaun, tanba ita-nia oan bei-oan sira iha direitu atu hatene saida mak akontese iha funu nia laran, no prosesu tomak to’o Timor-Leste ukun rasik aan”, fundamenta Jacinto.oly