GMN TV Regional ASEAN preokupa regulamentu negósiu iha TL

ASEAN preokupa regulamentu negósiu iha TL

0 views

Vise Prezidente Kamâra Komérsiu Indústria Timor-Leste (CCI-TL-sigla Português), João Alves, hateten, Konsellu Asesoria Emprezariál Association of Southeast Asian Nations (ASEAN) preokupa ho regulamentu negósiu iha Timor-Leste.

Ho nune’e, João Alves, konsidera adezaun ba Konsellu Asesoria Emprezariál ASEAN hanesan dezafiu boot ida ba CCI-TL.

“Ohin foin halo aprezentasaun saída mak ita iha no halo. Kona-bá regulamentu halo nusa? rejistu ne’e halo nusa? tanba sira preokupa tebes. Ohin mós esplika katak, CCI-TL hanesan parseiru Governu Timor-Leste, purtantu ida ne’e vantajen boot ida mós, tanba CCI-TL hanesan instituisaun ida ne’ebé mak privilejiadu para bele ajuda Governu Timor-Leste hodi bele hadi’a ekonomia nasaun nian. Importante tebes ba Timor-Leste atu sai membru ASEAN, rekezitu ida mak mantein nafatin kontaktu CCI-TL ho kâmara komérsiu sira iha ASEAN nian”, Vise Prezidente CCI-TL ne’e nia hafoin partisipa iha reuniaun virtuál Konsellu Asesoria Emprezariál ASEAN ba dala 88, Kuarta (20/01/2021), iha reuniaun ne’e CCI-TL halo aprezentasaun kona-bá servisu regulamentu atividade negósiu sira iha Timor-Leste.

Iha enkontru ne’e hili mós Diretor Ezekutivu CCI-TL sai hanesan pontu vokál Konsellu Asesoria Emprezariál ASEAN hodi haree preparasaun sira no fó informasaun ba estadu membru ASEAN antes adere ba Organizasaun Rejionál ne’e.

“Sé ita sai membru estadu ASEAN ne’e ita iha benefísiu mós iha. Tanba ida ne’e mak tinan hira nia laran ne’e kámara komérsiu servisu maka’as ho Trade Invest ho Ministru Koordenadór Asuntu Ekónomiku (MKAE) ho Ministériu Negósiu Estranjeiru no Kooperasaun (MNEK), para bele prepara Timor-Leste sai membru organizasaun rejionál ne’e. Tanba ohin sira husu kona-bá ita-nia atividade ekonómika saída mak ita halo, ita-nia karénsia osan hira mak ita iha, ita-nia regulamentu halo nusa, ita-nia viza sira ne’e halo nusa? Tanba buat sira ne’e hotu kontribui para bele hetan konfiansa husi estadu membru ASEAN nian. Ami trata asunto kleur tiha ona, agora hein Konsellu Minsitru (KM) aprova lista negativa husi lista sira ne’ebé ita prepara para depois ita propoin ba iha Konsellu Asesoria Emprezariál ASEAN”, hateten João Alves.

Setór sira ne’ebé CCI-TL hili no sei prepara atu haruka ba Konsellu Asesoria Emprezariál ASEAN mak hanesan Agrikultura, Turizmu, la inklui petróleu.

Diretór Ezekutivu Trade Invest, Arcanjo da Silva, hateten, Trade Invest nafatin fó apoiu ba CCI-TL atu halo preparasaun hodi adere ba iha Konsellu Asesoria Emprezariál ASEAN.

“Sé ita ko’alia kona-bá integrasaun ekonómika rejionál autór prinsipál ne’e mak sei dinamiza ekonomia maa iha rejiaun ne’e husi nasaun ida-idak nian kontextu Timor-Leste nian mak CCI-TL sira mak sei sai autór prinsipál halo integrasaun ekonómika iha rejiaun ASEAN. Ohin loron iha nasaun 10  sei tama hamutuk nasaun 11 nia rejiaun privadu nasionál mak tenke forte no kompetitivu iha rejiaun ASEAN ne’e”, hateten Diretór Ezekutivu Trade Invest ne’e.

Enkontru ne’e prezide husi membru husi nasaun Brunei Darussalam, CCI-TL hetan apoiu koordenasaun husi MNEK hanesan esforsu téknika atu adere ba ASEAN. oct


Banner

Foto

Notisia Ikus

PPN-Konselleiru KHUNTO deskute plataforma entendimentu OJE 2022

September 24, 2021
Konselleiru máximu Partidu KHUNTO, José dos Sa...

Posibilidade semana oin, Governu sei la estende tan SS iha Díli

September 24, 2021
Diretór Sala Situasaun Sentru Integradu Jestaun...

FRETILIN: Ema balu tenta destrói amizade Taur-Alkatiri iha MedSos

September 23, 2021
Xefe bankada FRETILIN, Francisco Miranda Branco,...

Governu propoin PR Lú Olo renova EE

September 23, 2021
Governu kontinua propoin, ba Prezidente Repúbli...

Governu hakotu SS iha munisípiu tolu, Díli mantein

September 23, 2021
Governu iha reuniaun Konsellu Ministru (KM), Kua...
1 2 3 643

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker