imazen ezemplu laos original:hosi google
Poster airin liña bo’ot eletrisidade 18, monu iha Munisípiu Maliana, Postu Administrativu Lolotoe, impaktu husi anin bo’ot.
Diretur Jeral EDTL, Virgílio Guteres hateten, loron hirak ne’e eletrisidade sempre lakan mate, tanba impaktu husi natureza anin bo’ot ne’ebé mak akontese iha fulan kotuk.
“Anin bo’ot ne’e afeta ahi Poster eletrisidade nian 18 mak monu iha Munisípiu Maliana, Postu-Administrativu Lolotoe nian, halo fatin sira ne’e grave tebes, alende ne’e iha fatin balu ahi avaria tanba impaktu natureza anin bo’ot halo ai bo’ot sira monu, ne’ebé to’o agora de’it mós iha Munisípiu Ainaro ninian sidade laran lakan ona, maibé iha ninin sira ne’e seidauk lakan tanba grave, airin no fiu sae malu, neduni atu rezolve presiza tempu uituan,” hateten Virgílio Guteres ba GMN iha nia kna’ar fatin Caicoli Dili, Segunda (19/02).
Nia haktuir, poster eletrisidade 18 ne’ebé mak monu iha área Munisípiu Maliana diresaun Lolotoe ne’e, diresaun ba Ermera no Atsabe seidauk bele asesu eletrisidade iha tempu badak.
“Difisil tebes iha tempu badak nia laran atu fornese ahi ba ita nia populasaun sira, tanba grave, airin no fiu monu. Tékniku EDTL limitadu tebes, agora dadaun teknika sira tenta hela atu rezolve, maibé servisu ida ne’e todan tebes ba pesoal sira iha terenu,” informa Virgílio.
Tanba ne’e, Virgílio husu ba populasaun sira atu hakmatek iha ida-idak niak fatin, labele ansi tanba buat ne’e todan tebes, presiza tempu.
Iha fatin seluk, komunidade Munisípiu Ermera, Postu-Administrativu Atsabe, Marselino de Jesus informa, fulan ida resin ona eletrisidade iha Postu Administrativu Atasabe seidauk lakan.
“Ahi mate iha Ermera teknik husi Maliana nian mak mai hadia, tanba teknika Munisípiu Ermera nian la iha, ne’eduni susar atu responde lalais, tanba sei presiza tempu atu hein teknik EDTL husi Munisípiu seluk nian, tanba ne’e mak durante fulan ida ona ahi mate iha parte Atsabe Vila suku Aitara, la hadia. To’o agora parte Suku 3 mak seidauk lakan, Atsabe Vila, Aitara no Lasaun, ne’eduni ami hela iha nakukun laran tanba ahi la lakan, kalan ami uza lampu ho minarai hodi sunu para fasilita ami hodi han no labarik sira hodi estuda,” katak Marselino.aba
