Primeiru Ministru (PM), Taur Matan Ruak, hateten, dadaun ne’e Governu seidauk diskuti hodi foti desizaun kona ba mandatu eis Primeiru Ministru, no atual Prezidenti Rejiaun Administrativa Espesial Oe-cusse Ambeno (RAOEA), Mari Alkatiri, ne’ebé sei remata iha fulan Jullu, tinan 2019.
“Dadaun ne’e ami seidauk ko’alia kona ba ida ne’e, mas kuandu ko’alia ami sei informa ba ita bo’ot sira, saida mak pozisaun Governu nian, kona ba ida ne’e, tanba ita bo’ot sira haree katak, Prezidenti Autoriedade nian ne’e naturalmente Governu mak propoin, maibé se mak fó pose ne’e, Prezidenti Repúblika. Entaun ne’e asuntu ida ké liga orgaun rua ne’e”, dehan PM Taur ba Jornalista sira hafoin remata enkontru ho Prezidenti Repúblika, Francisco Guterres ‘Lú-Olo’ Kinta (07/03/2019), iha Palásiu Prezidensial Nicolau Lobato Bairo Píte Dili.
Xefe Governu ne’e haktuir, agora seidauk iha opiniaun ida atu formula para avansa maibé naturalmente iha tempu badak sei ko’alia kona ba asuntu refere.
Líder máximu RAEOA ne’e simu pose husi eis Prezidenti Repúblika (PR), atual PM, Taur Matan Ruak, iha loron 30, fulan Jullu, tinan 2014 no sei remata iha loron 30, fulan Jullu, tinan 2019.
Prezidenti RAEOA, Mari Alkatiri simu ninia mandatu tuir lei 3/2014, ne’ebé aprova ho unanimidade husi órgaun PN, iha III lejislatura no promulga husi eis PR, Taur Matan Ruak.oly
