GMN TV Regional Projetu auto Estrada Suai, hamate ekonomia povu

Projetu auto Estrada Suai, hamate ekonomia povu

1 views

Deputadu Adriano do Nacimento husi bankada Partidu Demokratiku (PD) hateten katak, projetu auto Estrada Suai, Covalima, hamate ekonómia povu iha Munisipiu refere, tanba projetu auto estrada ne’e izola povu.

Adriano dehan, povu Suai iha Suku ida besik Aeroportu Suai ne’e, difisil tebes atu halo movimentu hodi dezenvolve sira nia moris, tanba projetu auto estrada.

“Kestaun ba ami agora, depois projetu auto Estrada ne’e la’o, povu atu ba fali to’os no rate, dalan laiha ona, tanba projetu auto Estrada ne’e, nia ateru sa’e to’o metro 7. Ami atu tula rai henek no fatuk atu hadia rate no ba ami nia moris fatin, ladi’ak ona, atu ba tesi aiteka sira ne’e hodi lori tun mai villa mós ladi’ak ona, silu batar atu lori tu’un mai povu nia uma mós ladi’ak ona,” levanta Adriano do Nacimento iha plenária Parlamentu Nasionál (PN), Segunda (24/04).

Eis Primeiru Vise Prezidenti Parlamentu Nasionál ne’e dehan, nia ko’alia ona ho Ministru Infra-estruturas kona ba asuntu ida ne’e hodi loke dalan ba povu atu bele halo movimentu, maibé to’o agora rezultadu laiha.

“Ita halo dalan, labele taka dalan fali ba ema atu dezenvolve ema nia moris, ema atu ba tesi aiteka mós labele ona, lori aihan sira mai villa mós labele ona, tanba auto Estrada,”relata Adriano.

Nia hatutan, kuandu aban bainrua mak situasaun hanesan ne’e nafatin, entaun izola tomak ona povu Suku ida ne’ebé mak hela besik iha Aeroportu Suai ne’e.

Nia afirma, la’os povu iha Suku ne’ebé mak hela besik Aeroportu de’it, maibé iha Suku ida tan iha Suai izoladu liu, tanba sira hela iha auto Estrada ne’e nia sorin, entaun sira labele hakat mai sorin, tanba auto Estrada taka.

“Ita halo dezenvolvimentu ida, labele hamate fali ekonómia povu nian, ou labele taka fali dalan ba asesu komunidade atu dezenvolve nia vida,” salienta Adriano.

Nune’e mós, Xefi bankada CNRT, Natalino dos Santos, husu ba Governu atu toma konsiderasaun urjente ba situasaun ida ne’e.

“Ita hakarak atu halo dezenvolvimentu, ita tenki haree mós ba asesu sidadaun sira ba fatin sira hanesan temi ona ne’e,” katak Natalino.

Iha fatin hanesan, deputadu Manuel de Castro husi bankada FRETILIN mós dehan, projetu auto estrada Suai ne’e, komisaun E PN ko’alia ona ho manager kompañia ne’ebé ezekuta, maibé kompañia ne’e dehan, sira sei buka solusaun ba problema ne’e.

“Sira hateten katak, sira sei buka meius atu halo fali estrada husi leten hodi fó fasilidades ba povu atu halo movimentu,”dehan Manuel de Castro.cos


Banner

Foto

Notisia Ikus

Prezidente EDTL.EP: La fasil rezolve eletrisidade lakan-mate

October 22, 2021
Prezidente Konsellu Administrasaun Eletrisidade ...

Ramos Horta: TL presiza ospitál modernu

October 22, 2021
Eis Prezidente Repúblika, José Ramos Horta, ha...

Ekipa haat husi MJ sei aranka ba rai-liur

October 22, 2021
Ministru Justisa (MJ), Manuel Carceres, informa,...

ONU sei fó asisténsia ba ElPrez no ElPar

October 21, 2021
Reprezentante Organizasaun Nasaun Unida (ONU) se...

Kalendáriu audiénsia OJE 2022, Komisaun C aprova ona

October 21, 2021
Prezidente Komisaun C, ne’ebé trata asuntu fi...
1 2 3 654

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker