Diretór Jerál (DJ) Ministério Turismo Comerçio Industria (MTCI), José Quintas, rekoñese fatin turístiku iha munisípiu sira kuaze abandona, tanba limitasaun orsamentu.
“Realidade hatudu rekursu umanu no finanseiru Governu limitadu, ita akompañia orsamentu MTCI la’o tun sa’e, ita koalia kona-bá dezenvolve turístiku ba ha’u simples de’it investimentu. Ita boot sira observa iha munisípiu sira fatin turístiku abandonadu la’ós MTCI lakohi dezenvolve limitasaun orsamentu mak sai problema”, DJ MTCI ne’e ba jornalista sira iha Sentru Informasaun Turizmu, Lecidere-Díli, Kuarta (01-07-2020).
Tanba ne’e, José husu ba na’i-ulun sira iha Parlamentu Nasionál (PN) no iha Governu konsistente investe iha setór turizmu no tenke tau osan ba setór turístiku.
“Ita haree esperénsia nasaun hotu setór turizmu ne’e importante, tenke kontinua investe hodi haree nia rendimentu hanesan sítiu relijiozu, iha Ramelau ita halo kontribuisaun osan sira ne’e, ita uza fali hadi’a lixu fatin, ami sei propoin ami nia Ministru haree to’ok, ita komesa kria ona dekretu lei ka diploma ministeriál, liu-liu kona-bá retribuisaun”, tenik DJ MTCI ne’e.
MTCI durante ne’e identifika turizmu relijiozu sira hanesan sítiu Na’in Feto Remelau, foho Matebian no selu-seluk tan. Ety
