Prezidente Autoridade Munisipál Bobonaro, Zeferino Soares dos Santos informa, populasaun Suku 10 no aldeia 14 mak to’o oras ne’e moris iha nakukun, maske Timor-Leste ukun-an kuaze tinan 20, maibe seidauk asesu ba liña eletrsidade.
Ne’e inklui suku rua ne’ebé iha fronteira, hanesan suku Saburai ho Cová, ne’e munisípiu laran tomak mak hela suku 10 ne’e.
“Iha ne’e suku de’it hela 10, karik sura ho balun aldeia ida rua de’it husi suku balun ne’ebé asesu mak seidauk, tanba aldeia kuaze 14 mak seidauk asesu eletrisidade”, Zeferino Soares dos Santos, hafoin sorumutu ho deputadu sira komisaun F, iha administrasaun Munisipál, Kinta (09/07/2020).
Kona-bá estrada, kuaze suku hotu aat hanesan, maibe hosi programa Governu ni'an rezolve ona balun, tuir posibilidade orsamentu Governu ni'an.
“Maibe iha áreas rurais ne’e ita iha programa R4D, ne’ebé halo estrada rural liga suku ida ba suku seluk, maibe estrada nasionál ne’ebé liga postu ho postu, iha munisipíu Bobonaro to’o agora seidauk hetan reabilitasaun total ba estrada sira ne’e, maske iha polítika iha ona, maibe ami hein katak Governu bele tau iha programa, tanba ne’e responsabilidade Governu sentrál ni'an, nune’e bele rezolve lalais ida ne’e”, hateten Zeferino.
Prezidente autoridade ne’e afirma tan, kondisaun estrada iha munisípiu Bobonaro kuaze sei grave hotu, tanba to’o agora seidauk halo reabilitasaun ruma.
“Ami bele husu de’it apoiu ba Institutu Gestaun Ekipamentus, sira mai taka de’it dalan ne’ebé ko’ak sira, hodi nune’e movimentasaun komunidade ne’e bele la’o nafatin, maibe atu hadi’ak total ho tau alkatraun ne’e, ami hein katak Governu sentrál bele tau atensaun ba ida ne’e,” tenik autoridade munisipál ne’e.
Atu rezolve problema hirak ne’e Prezidente Autoridade munisípiu Bobonaro ne'e, hato’o ona proposta planu polítika dezenvolvimentu munisipál ba Governu kompetente atu bele responde ba problema refere.
Munisipíu Bobonaro iha postu administrativu 6, suku 50 no aldeia 193, ho total populasaun rihun 111.006. Say
