Xefe Suku Suni-Ufe, Postu Nitibe, Crisantos Taanele, informan rai kuaze hektare tolu ne’ebé komunidade entrega ba autoridade Rejiaun Administrativa Espesial Oe-Cusse Ambeno (RAEOA) to’o agora sei abandona hela no rai ne’e komunidade no autoridade lokál sira entrega kedas iha primeiru mandatu autoridade RAEOA, Marí Alkatiri nini’an.
Tuir Autoridade lokál ne’e katak, planu rai ho luan kuaze hektare tolu ho balun ne’e, hodi halo fatin plantasaun ka to’os permanente ida, maibé to’o agora laiha kontinuasaun ba planu refere.
“Iha momentu ne’ebá ho ha’u-nia estrutura tomak kompostu husi Konsellu Suku tomak aldeia tolu ami indika fatin ida Sekretária Rejionál Asuntu Agrikultura ni’an hodi halo to’os permanente, atu nune’e kuda hudi tambaga, servisu hamutuk entre Autoridade RAEOA nini’an ho komunidade suku Suni-Ufe ne’ebé iha momentu ne’ebá konsege hamoos ekipamentu kompañia nini’an depois hamoos hotu tali tahan, du’ut, ai, mas ha’u la hatene depois de ida ne’e nu’udár autoridade lokál mós laiha tan informasaun, laiha tan koñesimentu to’o ohin loron buat ne’ebé ami oferese ne’e servisu hamutuk entre autoridade RAEOA ni’an ho komunidade ate agora la iha kontinuasaun,” Xefe Suku Suni-Ufe ne’e ba GMN iha RAEOA, Sesta (21/08/2020).
Autoridade lokál ne’e mos husu ba Vise Ministru Obras Publikas no Auroridade RAEOA Sekretária Rejionál Asuntu Agrikultura atu halo kontinuasaun hodi fó netik espetativa ida ba inan-aman no ba komunidade, nune’e ba oin iha esperansa katak autoridade sira sei tané nafatin preokupasaun povu ni’an.
“Aproveita iha fatin ida ne’e ami hakarak relata ba Sekretária Rejionál Asuntu Agrikultura prosesu ida ne’e to’o agora laiha kontinuasaun. Tanba ne’e husu ba na’i-ulun sira atu oinsa fó netik espetativa ida ba ita nia inan-aman no ba ita nia komunidade ba oin sira tau aten barani no iha esperansa katak ita nia autoridade sira sei tané nafatin ita nia preokupasaun hirak ne’e, tanba ami iha baze sente loron-loron insulta mai husi ita nia inan-aman katak, ita oferese tiha rai kuaze hektare 3 resin, depois Governu soe hela de’it, nune’e ida ne’e mak preokupasaun komunidade nini’an”, dehan Crisantos.
Hatán ba preokupasaun ne’e, Sekretária Rejionál Asuntu Agrikultura RAEOA, José Eta, hatete, presiza duni atu fó agradese ba buat di’ak ruma ne’ebé hala’o ona iha tempu pasadu no buat hirak ne’ebé seidauk la’o sei kontinua esforsu atu rezolve.
“Se fó vantajen di’ak ba ita-nia povu, ita sei esforsu para bele kontinua. Maibé ha’u la promete aban ita hahú ida ne’ebá ita iha ekipa tékniku sira dala ruma tinan 5 liu ba sira mós dalaruma involve iha prosesu ida ne’e, sira hatene ami sei husu tuir oinsa ninia prosesu to’o ohin loron, atu nune’e ita hakatak ba kontinua bele komprende no hatene ninia lala’ok ne’e oinsa, mas atu hateten de’it ba ita hotu katak autoridade agora dau-daun hanoin boot ida katak problema prinsipál liu iha Oe-Cusse ne’e mak bee-moos. Bee moos ne’e lolos husi agrikultura mak fo todan fali ba iha SAS tanba atitude pr’atika agrikultura mak ita lere hotu depois sunu la’os lere deit depois tesi ba halo uma halo luhan halo lutu depois no fim ita fo todan ba fali ita nia maluk SAS. Kona ba bee la iha ne’e laos We Nuno deit kuaze Oecusse tomak sub rejional tolu enfrenta problema ida ne’e ne’ebé sai ita hotu nia problema maibe husu ita hotu ninia kontribuisaun mos”,dehan nia.
Entretantu Xefe Suku Suni-Ufe dehan, kondisaun jeral ne’ebé populasaun infrenta mak dalan ne’ebé halo ligasaun husi Pante Makasar ba Postu Administrativu Nítibe ne’ebé to’o agora kontinua aat.
Aleinde problema estrada suku ne’e mos to’o agora seidauk asesu bee-moos ligadu ho mudansa klimátika ne’ebé halo bee-matan maran. Tanba ne’e komunidade tenke konsume de’it bee posu maske bee ne’e meer.aba
