Sidadaun estránjeiru Nova-Zelandia ida husi Liran-Indonézia tama ilegalmente mai Atauro, Timor-Leste iha Kuarta, loron 13, fulan ne'e, mais ou menus tuku 10:00 kalan oras Timor-Leste.
Nune’e komunidade Atauro, munisípiu Díli, hetan sidadaun estránjeiru ida husi nasaun Nova-Zelandia iha Akrema ne’ebé mak tama ilegalmente ho bero-ai husi Liran-Indonézia mai illa Atauro, nune'e halo sira preokupadu.
Segundu Komandante Polísia Nasional Timor-Leste (PNTL) munisípiu Díli, Superintendente Euclides Belo, hateten, sidadaun estránjeiru ne’e hetan husi abitante Akrema, hafoin informa ba Polísia ba foti sidadaun estránjeiru refere, hodi asegura iha ospital postu administrátivu Atauro, nune'e bele prevene COVID-19.
“Horikalan (Horibainrua kalan-red) sidadaun estránjeiru ida ho identidade Jhon Borres Fo, idade kuaze 67, nia orijin husi nasaun Nova-Zelandia ne’ebé mai husi Liran, tula husi komunidade Liran iha Bero, tun iha Akrema, aldeia Uarana, postu administrativu Atauro ne’ebé komunidade na’in rua Atauro ni'an, husi Uarana iha oras tuku 10:00 kalan. Sidadaun Atauro ne’e hetan ema estranjeiru ne’e mak señor Benjamin no Duaba da Silva”, esplika Segundu Komandante PNTL munisípiu Díli, Superintendente Euclides Belo, ba jornalista sira, Kinta (13/08/20), iha Kuartel Jerál PNTL Kaikoli, Díli.
Euclides akresenta, wainhira hetan tiha sidadaun estránjeiru ne’e, abitante Akrema informa ba Polísia Atauro no Unidade Polísia Marítima no membru Forsa armada Timor-Leste iha Atauro, no mós halo koordenasaun ho parte médiku, hodi ba tula sidadaun estranjeiru ne’e, nune'e dau-dauk ne’e aguarda hela iha ospital postu Atauro.
Alende ne’e, iha Kuarta (12/08/20), PNTL detein mane ida iha área Elemloi, suku Comoro, postu administrátivu Dom Aleixo, munisípiu Díli, tanba laiha karta kondusaun no bosok membru Polísia ne’ebé hala’o kna’ar iha terenu katak, infratór ne’e membru forsa armada husi instituisaun F-FDTL, maibé hafoin halo identifikasaun iha Polísia Militar, ikus mai deskobre infratór ne’e la’os membru forsa armada, nune’e Polísia detein ema ne’e iha sela detensaun durante oras 72, hafoin submete ba primeiru interogatóriu iha Tribunal Distrital Díli. avi
