Prezidente Autoridade Munisípu Bobonaro, Zeferino Soares dos Santos, husu ba Governu apoia transporte mai iha fronteira hodi tula pesoál hirak ne’ebé ne’ebé halo movimentu ilegál iha fronteira ba fatin kuarentena.
“Estadu Emerjénsia (EE) komunidade labele movimentu, servisu la la’o, entaun kareta Estadu ni’an la’o, entaun ami uza kareta Estadu tula ema hodi ba kuarentena, maibé agora servisu Estadu ni’an la’o ona, entaun ami presiza kareta ida, tanba iha ema ruma ilegál tama entaun Unidade Patrullmanetu Fronteira (UPF) relata ba Polísia Nasionál Timor-Leste (PNTL) no PNTL husu transporte atu tula, entaun ami presiza espesífiku hodi tula ema tama sai ilegál”, Prezidente Autoridade Munisípu Bobonaro ne’e ba jornalista sira iha kompleksu Marobo, postu administrativu Bobonaro, munisípiu Bobonaro, Sesta (07-08-2020).
Zeferino hateten, hahú husi EE dahuluk munisípiu Bobonaro kria ona ekipa taskforce ne’ebé kompostu husi servisu diresaun munisipál no parte seguransa, hodi apoiu ba prevensaun risku Corona Virus Disease 2019 (COVID-19).
Adjuntu Komandante PNTL munisípiu Bobonaro, Antonino Mauluta mós informa, parte seguransa kontinua preparadu iha fronteira, hodi halo atuasaun ba sidadaun ne’ebé tenta halo movimentu ilegál.
“Ita-nia UPF no seguransa destaka iha parte fronteira no ami iha segunda liña, ami preparadu ona hodi kobre iha Altu-Lebos mai to’o iha Mota-Ain, ami koloka ekipa dalaruma bele na’in 5, maibé ami bele koopera ho komunidade, atu nune’e ema foun ruma tama mai ami bele halo atuasaun”, tenik Antonino.
Tuir dadus husi PNTL munisípiu Bobonaro totál membru PNTL ne’ebé dau-dauk ne’e kontinua halo servisu iha munisípiu refere hamutuk 150 resin. ida
