Diretór Servisu Saúde Munisípiu Ermera, António de Deus Fátima hetan pankada dala rua iha parte hirus matan, hosi família pasiente pozitivu COVID-19
Família pasiente COVID-19 halo asaun ne’e, tanba Diretór ne’e simu autorizasaun hosi Sentru Integradu Jestaun Krize (SIJK), hodi transfere pasiente pozitivu ba izolamentu iha Tasi Tolu, Díli.
Portavós Pesoál Saúde Natalino Salsinha lamenta, aktu família nian ne’e, tanba aktu ne’e konsidera hanesan krime, no husu autoridade PNTL foti medida rigurozu ba hahalok ne’e.
“Ami pesoál saúde Munisípiu Ermera lamenta ho atitude família pasiente ne’ebé insulta no baku Diretór SSM Ermera, ida ne’e ami konsidera aktu krime,” deklara pesoal saúde ne’e, liu hosi konferénsia imprensa iha Gleno Segunda (02/08).
Vise Koordenadora Forsa Tarefa Prevensaun no Mitigasaun Surtu COVID-19, Odete da Silva Viegas konfirma, hanesan profesionál saúde, iha responsabilidade hodi asegura kazu pozitivu hirak ne’e, tenke separa hosi família nune’e virus labele da’et ba ema seluk.
“Ha’u sente ida ne’e ladún justu, na’in ba saúde hala’o tiha ona servisu todan, laiha ona fatin, laiha kolaborasaun hosi entidade hotu-hotu, liuliu família nia ema hetan pozitivu,”dehan Odete.
Kazu ne’e, parte saúde relata ona ba SIJK, oinsá autoridade kompetente sira atu bele haree ba asuntu ne’e, nune’e labele désmotiva profisionál saúde sira nia servisu.Eni
