Xefe Sentru Saúde (SS) Guisarudu, Postu Administrativu Hatolia B, Munisípiu Ermera, Maria Madalena Mali, hatete, pesoál saúde ne’ebé hala’o atendimentu iha postu Guisarudu la sufisiente, hodi atende nesesidade komunide iha postu refere.
Tanba ne’e pesoál saúde sira iha sentru saúde ne’e, tenke halo rotasaun, hodi fó atendimentu ba komunidade iha postu saúde ne’ebé estabelese ona.
“Ami foin prienxe médiku na’in lima, maibé médiku na’in lima ne’e la’os permanente iha ne’e, sira halo rotasaun loron rua iha postu, loron tolu iha sentru, parteira iha ne’e na’in tolu de’it, na’in tolu ne’e tenke kobre suku lima ne’e hotu,” informa Xefe Sentru Saúde ne’e, iha nia knaar fatin Hatolia B, Ermera Sábadu (13/08).
Postu Administrativu Hatolia B iha postu saúde lima, husi postu lima ne’e kada postu ida iha sentru saúde haat.
Hatán ba preokupasaun ne’e, Vise Ministru Saúde, Bonifácio Maucoli dos Reis, konfirma, Ministériu dadaun ne’e halo ona rekrutamentu, ba médiku, parteira, enfremeiru, ne’ebé sei koloka ba postu no sentru sira.
“Agora ita sei identifika fasilidade saúde sira ne’ebé mak menus rekursu umanu ne’e, agora ita halo hela rekrutamentu, kuandu rekrutamentu finaliza ona ita sei koloka,” hateten Vise MS.
Sentru Saúde Guisarudu servisu atende nesesidade Suku lima, hanesan Lisapat, Fatubolu, Fatubessi, Mau-obo no Urahou, ho populasaun besik rihun 20.Eni
