Governu sei koordena ho kompañia Air Timor, hodi aluga aviaun tula hotu estudante sira iha rai-liur mai Timor-Leste (TL).
Diretór Jeral asuntu Protokolu Ministériu Negósiu Estranjeiru no Kooperasaun (MNEK), Juvencio de Jesus Martins, hateten, tuir planu iha fulan Outubru ne’e, Governu sei koordena ho kompañia Air Timor hodi tula estudante besik 100 ne’ebé hala’o estudu iha rai-liur fila mai TL, tanba númeru COVID-19 iha estranjeiru kontinua aumenta ba bei-beik.
“MNEK sei halo koordenasaun mós ho parte Ministériu relevante sira atu lori estudante Timor-oan sira ne’ebé halo estudu iha rai-liur hanesan Malázia, Xina 20 pessoas, Nova Zelándia 30 pessoas hahú iha loron 01 to’o 05, fulan Outubru ne’e hodi konsentra iha Kuala Lumpur-Malázia foin bele mai iha TL, hodi bele prevene sira husi pandemia COVID-19”, Diretór Jeral asuntu Protokolu MNEK ne’e ba GMN hafoin akompaña pasajeiru profesór no estudante Timor-oan ne’ebé mai husi rai-liur ho aviaun Euroatlantic iha Aeroportu Prezidente Nicolau Lobato, Díli, Segunda (21/09/2020).
Juvencio informa, iha tinan ne’e Governu sei buka dalan hodi tula mós estudante Timor-oan hamutuk 72 ne’ebé tuir formasaun iha Israel.
“Loos duni ita nia estudante 72 ne’ebé ba tuir formasaun moderniza agrikultura ka agrikultura avansadu iha Israel ne’e mós halo ona pedidu ba ita nia Governu atu tula sira mai iha Timor, tanba entre estudante Timor-oan 72 ne’e, ida pozitivu ona COVID-19 no dau-daun ne’e iha hela fatin izolamentu, maibé ita muda fali ba faze segundu mais ou menus iha tinan ida ne’e ita tenke halo deportasi estudante husi Israel mai TL, tanba sira mós tauk moras pandemia COVID-19 ne’ebé sa’e maka’as iha rai-liur, tanba agora MNEK sei buka alternativu hodi koordena Ministériu Edukasaun, Saúde hodi lori estudante Timor-oan iha Israel bele to’o mai to’o iha TL”, Dehan Diretór Jeral asuntu Protokolu MNEK ne’e.
Foin la-lais ne’e liu husi vídeo ne’ebé GMN asesu, estudante hirak ne’e ezije Governu TL atu buka solusaun hodi deporta sira, tanba kontratu ba formasaun termina ona, inklui iha risku ba transmisaun COVID-19.
Enkuantu iha Segunda semana ne’e, Governu fasilita aviaun tula profesór sira husi Portugál hamutuk 117 ho mós estudante Timor-oan hamutuk 74 to’o ona iha TL ho aviaun Euroatlantic. aba
