Diplomata senior Timor-Leste, José Luis Guterres (LuGu), deklara, situasaun polítika, ekonómika, justisa, sosiál iha rai-laran ne’e seidauk diak, tanba ne’e nasaun ida ne’e sei presiza nafatin Maun Bo’ot Kay Rala Xanana Gusmão, ninia tulun atu lori rai ne’e ba dalan los no prósperu.
Tuir Eis Ministru Negósiu Estranjeiru no Kooperasaun, José Luis Guterres, katak, kona-ba asaun karitativa ne’ebé líder karismátiku, Kay Rala Xanana Gusmão, halo oras ne’e dadauk hanesan última esperansa ba katuas no ferik sira.
José Luis Guterres hato'o lia hirak ne'e, iha Postu Administrativu Natarbora, Munisipiu Manatuto, semana kotuk, fulan ne’e, bainhira akompaña Xanana Gusmão hala’o asaun karidade iha área refere.
José Luis Guterres dehan, asaun ne'ebé Xanana halo durante ne'e hanesan esperansa ikus ba ferik no katuas sira, tanba bainhira laiha Xanana, difísil tebes ba rai ne'e atu ba oin.
“Ha’u primeira vez mak mai hamutuk ho Maun Xanana akompaña buat ne’ebé maun halo. Ha’u hatene la’os tanba atu mai iha ne’e, tanba katuas (Maun Xanana) mos hakarak atu haree imi, imi mos hakarak haree katuas. Iha Oe-Cusse ne’eba katuas ho ferik deit barak teb-tebes hein iha estrada ba simu nia, iha Suai iha fatin barak, ne’ebé tempu ida ha’u hetan Maun Xanana iha Loes ne’eba, ha’u dehan, Maun, ha’u haree ida ne’e hanesan esperansa última ba sira ne’ebé ohin loron katuas ho ferik ona, tanba se ita bo’ot la fó ita-nia kbiit, matenek, enerjia para hadia rai ida ne’e, difísil teb-tebes rai ida ne’e sei diak. Tanba ne’e mak ha’u ho laran tomak apoiu teb-tebes ba ita bo’ot, ba Maun José Ramos Horta, ita-nia eis Prezidente Repúblika, ne’ebé hori uluk ami halibur malu para konvense nasaun sira seluk, maibe ami hatene katak se laiha demokrasia, laiha respeita ba direitus humanus, laiha intendimentu entre ita, difísil teb-tebes ba rai ne’e atu iha dezenvolvimentu ne’ebé ita-nia ferik, katuas sira bele hetan oportunidade ba moris diak liu. Maun Xanana iha devér morál hanesan komandante em Xefe FALINTIL hori uluk, nia labele abandona ita, wainhira ita iha situasaun difísil. Ne’ebé povu Timor tomak imi koalia ba, hatete ba Maun Xanana katak, ita-nia situasaun seidauk diak, presiza ita bo’ot nia matenek, ita bo’ot nia hanoin para ita hamutuk ho nia hadia rai Timor, polítika rai-laran tenke estavel, respeita malu, mezmu ita iha diferensa opiniaun, ita respeita nafatin malu, la presiza baku malu, la presiza baku meja”, dehan José Luis Guterres.
Depois sorumutu ho komunidade Natarbora, Xanana ho ninia ekipa kontinua distribui nesesidade bázika ba komunidade kbi'it laek sira iha área refere. GMN
