Premiadu Nobel da Paz, José Ramos Horta, hatete, durante funu ba libertasaun Nasionál Timor-Leste nian, hahú hosi saudozu Nicolau dos Reis Lobato, no mate iha kombate nia laran iha tinan 1978, iha Mindelo, Turiscai, Kay Rala Xanana Gusmão mak reorganiza fali partidu FRETILIN no FALINTIL hodi kontra inimigu.
Tanba ne'e Eis Prezidente Repúblika ne'e Konsidera, Xanana Gusmão Gusmão nu'udar líder kontinuadór ne'ebé iha estratéjia no kapasidade hodi reorganiza hikas funu ne'e.
Tuir Horta, Xanana mak mesias, tanba mosu iha 1978, bainhira Nicolau Lobato mate iha gerilla.
"FALINTIL rahun iha 1978 to’o 1989, Komite Sentrál FRETILIN mohu, FALINTIL nakfera, bombardeamentu ema lubuk ida, no barak mak hanoin luta hotu ona, i ami iha liur hanoin se mak atu reorganiza, no Nicolau Lobato mate iha kombate, derepente mesias ida mosu, simu informasaun hosi Dom Martinho da Costa Lopes, ami haree fotográfia enkontru iha Larigutu. Agora presiza ema ida ho vontade hanesan besi-asu, tanba iha luta ne'e ema mate hotu, hamlaha, mundu la liga, se mak atu hahú fila-fali, ema ne'ebé atu hahú fila-fali, nia tenke iha tenke iha dom espesiál, ikus mai reorganiza, FRETILIN, reorganiza FALINTIL, no fó esperansa ba povu, to'o ohin, nia (Xanana) nafatin”, dehan Horta iha nia dikursu iha komunidade Katrai-Kraik, Postu Administrativu Letefoho, Munisípiu Ermera, Sesta (18/9).
Horta mós espresa nia sentimentu kontente iha komunidade Katrai no Lauana nia oin, tanba hamutuk ho Xanana Gusmão, hotu-hotu rona mensajen husi líder karismátiku Kay Rala Xanana Gusmão.
Xanana rekoñese, nia fiar katak sei reorganiza funu iha, kuandu Nicolau Lobato mate ona iha kombate nia laran iha 1978, iha Mindelo, Turiscai.
"Ohin maun Ramos mós dehan, sira iha liur rona katak, la hatene se mak atu organiza no reorganiza fali ka lae, to'o mosu Dom Martinho, nia haruka ba liur katak, iha fali ona, organiza fali ona," dehan Xanana.
Xanana mós dehan, hafoin reorganiza FRETILIN, FALINTIL no fó esperansa ba povu, maibé ema balun iha estranjeiru dehan Xanana traidór.
"Maibé husi liur ema balun bolu ha'u dehan, ha'u traidór, tanba ha'u reorganiza FRETILIN, FALINTIL no povu, maibé ema balun dehan ha'u traidór, tanba ne'e iha 1986, ha'u sai husi FRETILIN hodi lidera de'it FALINTIL no funu, hanesan ema bolu katak komandante ein xefe," termina Eis Komandate em chefe ne'e.
Iha vizita ne'e mós, líder nasionál na'in rua ne'e apoiu mós sasan infraestrutura hanesan semente, kalen ba Kapela Nossa Senhora Maria Auxiliadora, Katrai no Lauana, inklui apoiu umanitária ba komunidade kbiit laek sira ne'ebé identifika ona. San
