Diplomata senior Timor-Leste, José Ramos Horta, hatete, naran Kay Rala Xanana Gusmão no luta ne’ebé nia halo ba Timor-Leste (TL) liu fali títulu formál ne’ebé ema balu hetan.
Eis Prezidente Repúblika, José Ramos Horta, hato’o lia hirak ne’e bainhira hasoru malu ho komunidade Suku Fahi-Nehan, Postu Administrativu Same, Munisípiu Manufahi, Kuarta (24/9/2020).
Laureadu nobel da paz ne’e hatete, ema ida-idak ho nia luta no istória rasik, maibe kona-ba Xanana nia naran, boot liu fali títulu temporáriu, títulu formál ou ofisiál ne’ebé ema balun hetan.
“Xanana sei Xanana nafatin. Iha Áfrika du Sul ne’e malae metan bo’ot ida mundu tomak koñese ne’e, nia Mandela ses-an husi Prezidente Repúblika, entaun mundu tomak hakrúk ba nia. Iha ema balu, tanba sira-nia fatin iha istória, sira-nia fatin iha luta, sira-nia naran bo’ot liu fali títulu temporáriu, títulu formál que ema hetan, tanba ohin bele Prezidente da Repúblika, aban lae ona. Maun Xanana nia naran bo’ot teb-tebes”, dehan eis Prezidente Repúblika, José Ramos Horta.
Iha fatin hanesan, líder karismátiku, Kay Rala Xanana Gusmão, hatete, líder sira nia naran bele boot hanesan foho Kablaki, Ramelau, maibe keta haluha, tanba povu nia luta mak Timor-Leste hetan independensia ne’e.
“Povu bele luta, líder laiha. Mas líder bele boot to’o iha ne’ebé, boot liu foho Ramelau, boot liu Kablaki sira ne’e, mas povu la luta, líder kala kuitadu, ne’e ka lae? ‘Povu doko ulun hodi konkorda’. Ne’ebé povu ne’e terus hahú husi 1975 to’o 1999 no ho ida ne’e mak ita bele ukun-an”, dehan líder karismátiku Kay Rala Xanana Gusmão.
Hafoin ne’e, Xanana Gusmão hamutuk ho José Ramos Horta, inklui Timor-oan balu fahe nesesidade bázika ba komunidade iha suku refere.
Entretantu suku Fahi-Nehan kompostu husi aldeia tolu mak hanesan Daurata, Daramatan no Aenesi. GMN
