Komandante Em Xefe FALINTIL iha tempu rezisténsia, Kay Rala Xanana Gusmão, deklara, iha Suku Mindelo, Postu Administrativu Turiscai, Munisípiu Manufahi, nu’udar fatin ne’ebé Nicolau Lobato mate ho populasaun barak, tanba operasaun skylight ne’ebé envolve husi membru Comité Central da FRETILIN (CCF), Alarico Fernandes ho tropa Indonézia sira.
“Imi (Hirak uluk) mak nafatin ne’e. Husi Nicolau Lobato mate iha ne’e (Mindelo) membru Comité Central balu mate, Carvarino mos mate la’os iha ne’e, maibe iha Sul ne’eba, Sahe mos mate iha ne’eba, sira balu ba ho Alarico Fernandes iha Remexio (Aileu) nini’an hasai skylight, imi (povu) rona ona ka seidauk, sira rende ho ita-nia radio komunikasaun, rende ho forsas barak hodi dehan, ita labele ona, hmmmmm”, dehan Kay Rala Xanana Gusmão ba povu tomak iha Suku Mindelo, Kuarta (23/9/2020), no hetan basa liman maka’as.
Alende fahe nesesidade bázika ba povu kbiit laek sira no mos juventude iha área refere, Xanana mos lori eis Prezidente Repúblika, José Ramos Horta, vizita fatin ne’ebé uluk Saudozo Nicolau Lobato hakotu iis iha Binani, Aldeia Maubessi, Suku Mindelo, Postu Turiscai, Munisipiu Manufahi.
Clementino de Jesus Nunes, nu’udar sasin rekoñese, saudozu Nicolau Lobato mate duni iha fatin Binani, Mindelo, maibé forsa Indonézia ho aviaun mai lori soudozu no to'o oras ne'e la hatene nia paradeiru.
“Derepente kilat taruru iha ne’e ami hakfodak, sira serku bo’ot ida iha ne’e, parakedista tun no ema mos kala hatene, maun bo’ot (Nicolau Lobato) nia ain fatin liu, serku bo’ot ida iha ne’e aviaun hamonu ema parakedista, aviaun ne’e semo bad-badak deit, ema mai iha ne’e armadu hotu no derepente sira ne’e nakonu hotu, entaun halo nusa maun bo’ot sira kala liu fatin la diak, tanba fatin sira ne’e metin hotu, agora ami forsa (FALINTIL) iha ne’e toba fatin la bo’ok-an, ida be sente hakfodak ne’e mate no ami ida toba tun fatin ne’e mak sei moris ne’e”, deklara sasin Clementino De Jesus Nunes.
Hafoin vizita fatin saudozo Nicolau Lobato hakotu nia iis, Xanana hamutuk ho ninia ekipa, distribui nesesidade bázika ba povu kbiit laek sira iha suku refere. GMN
